Read Ebaibuli 1961 Anyoun 23 Bible Online

Anyoun 23 - Ebaibuli 1961 bible

Anyoun 23

¹ “Siricamununei akirot kere naka aisab: siripikanakin akonikan nepepe ka ikaronok, araun ekajenan lomam edolit.

² Siritupanari ekodet aswam aronis; kwabo sirikitejen akirot kopaarite mama ejai ekodet aibelokin etube:

³ Kwabo sirikimin yenikican naitubokinia akekiro.

⁴ “Arai kidum emoŋ loka lokasurupokon arai akesigiria eoliorit, kibusakinit ainari ŋes.

⁵Arai kianyu asigiria naka lokilait ijo icikakinit abwokonike, komam ipuda aiŋarakin ŋes, kibusakinit ijo aiŋarakin ŋes cut.

⁶ “Sirikibelok akirot naka yenikicanikon naitubokinia.

⁷ Kinacenenei akirot naka aisab; siriari yenimam aronis ka ikadoliton: naarai mam eoŋ etoioki ikaronon.

⁸ Sirikijau ainakinet: naarai itumudaki ainakinet akonye nuka kaluesesenete, ibelokini da akiro nuka ikadolitok.

⁹ “Sirireit imoit: naarai Ijenete yesi cut etau loka imoit, naarai iraas kolo yesi da imo kakwap nako Misiri.

¹⁰ “Iyeenenei ikinyomokon kokar ikanykape, itukonokini amiokec:

¹¹Konye kisiyenuni alup kokaru lokikanyetekaarei, kiukasi; kosodete lukican luka ikonituŋa ainyam: luedepanaros konyam etiaŋ loka ais. Kikonenenei nen kamanakon naka emusabibu, ka naka eseituni.

¹² “Kiswamaenenei akoniswamisio kapaarasia akanykape, kiyenununei kapaaran nakikanyetekaarei: tetere iyeŋuni emoŋokon ka akonisigiria, ikwaruni da okoku loka abulesitikon, ka imoit.

¹³ Kocoito akiro kere nukalimok yes: kwabo sirilimito ekiror loka idekesio ice, karaida apupunio kaitukukon.

¹⁴ “Kidarenenei epucit mamakaŋ irwan auni ŋolikaru.

¹⁵ Kidarenenei epucit loka imugatin lumam itubuunitoi: inyamenenei imugatin lumam itubuunitoi apaarasia akanykaarei, kwape kecorakinia jo, kapak naeseunitai kolap loka Abib (naarai kaŋol ŋes kinyounio koMisiri); kwabo mam etakanuni idiopet kakonyeneka komamei ibore.

¹⁶ Ido epucit loka aide araito nusodit nuka aitaaritoikon, nuibu koyeik mana: ido epucit loka aisak, kosaŋe loka ekaru, naisakenenaa aitaaritoikon komana.

¹⁷Etakanunete ikiliokokon kere kakonyen nuka EJAKAIT Edeke irwan auni ŋolikaru.

¹⁸“Siriinakinenei aokot nuka asubanitika kimugatin luitubuunitoi; mam iteperonori da asiepai naka epucitika.

¹⁹ “Iyaununei nusodit nuegeunete alupokon aira togo loka EJAKAIT Ekonideke. “Siripoenenei ikalol kakile nuka totoke.

²⁰“Koany, ejukuni emalaika kiŋarenekon, aidar jo korot, ka ayaŋaar da jo aibois naetemokinit.

²¹ Kocoito ŋes, kiirasi eporotoke; sirikitunyunyurikis: naarai mam itimi aibucarikus; naarai ejai ekakiror tomakeŋ.

²² “Konye arai kipup cut eporotoke, kiswamaenenei kere nuenera; araun do lokasurup loka lukasurupokon, etokokoli lukitokokolete jo.

²³ Naarai iŋarenikini ekamalaika jo, kitolomari jo neejai Emorait, ka Ekitit, ka Eperisit, ka Ekanaanit, ka Ekibit, ka Eyebusit: amudiari eoŋ kes.

²⁴ Sirikikukonokin idekesiokec, karaida aijaanakin, ido siriswamaenenei kwape ejaatar aswamisiokec: konye icakari kes cut, ibilibilei ipirinokec cut.

²⁵ Ijaanakinete yesi EJAKAIT Ekusideke, ŋes da isirereŋi inyamatakon ka akonikipi da; alemari eoŋ adekesia kokidiŋikon.

²⁶ Emameun yenikijecuna, arai yenirakan, kotoma akwapukon: etodoli etiai leka apaarasiakon.

²⁷ Ejukuni asogimuka akonyenekon, eticani ituŋa kere luidolokini ijo, etobonori lukasurupokon kere kau.

²⁸ Ejukuni ekaturuturut kakonyenekon, loireŋeari Ekibit, ka Ekanaanit, ka Ekitit, kakonyenekon.

²⁹ Mam ereŋeari kes kakonyenekon kokaru ediopet; tetere mam akwap iswapi, tetere mam itiaŋ da luka ais ipuaros kamakon.

³⁰Ereneanari kes motimot kakonyenekon, aitodol neiyatakinor ijo, kirum akwap.

³¹ Ebwaikini eikorukon anyoun kAŋolol Nakareŋan kiton aŋolol naka Ipilisitian, anyoun da kamodiŋ kiton ocor: naarai ejaikini luiboiete kakwap akanikon; ireŋeari ijo kes kakonyenekono

³²Siritutukenenete kakes, karaida kikecedekesio.

³³ Siriboienenete kesi kakwapukon, kinyeis aitidiakar jo kaneajai: naarai arai kijaanak idekesiokec, abeit eraun akuluma kamakon.”