Read Ebaibuli 1961 Anyoun 24 Bible Online

Anyoun 24 - Ebaibuli 1961 bible

Anyoun 24

¹ Kobala ŋesi Musa ebe, “Kodoka mama ejai EJAKAIT, ijo ka Aaron, ka Nadab, ka Abiku, ka akaisakanykaarei komakio luka Isirael; komaata da kama elwana.

²Ikunyakini Musa bon mama ejai EJAKAIT; konye kes mam ikunyakinete; karaida ituŋa adokar nepepe kaŋes.”

³Kobu Musa kolimok ituŋa akiro kere nuka EJAKAIT, ka itubesia kere; koboŋokis ituŋa kere keporoto ediopet, kobalas ebe, “Akiro kere nuener EJAKAIT kiswamai isio.”

⁴ Kiwadik Musa akiro kere nuka EJAKAIT: konyou tupuruc sek, kodukok etem kwap kemoru, ka ipirin itomon ka luarei, kwape ejaatar atekerin atomon ka nuarei nuka Isirael.

⁵Kijuka ikatumunak luka idwe luka Isirael, luapotu koinakis ainakineta nuicweio, koinakis ainakineta nuka ainapakin nuka imoŋin mama ejai EJAKAIT.

⁶ Koyaŋa Musa atutubet naka aokot, kobukok atiboi; atutubet ace da naka aokot kobwatanak otem.

⁷Kolem eitabo loka aitutuket, kosiomak ituŋa: kobalas kesi ebe, “Nuener EJAKAIT kere, kiswamai isio, kirimari da.”

⁸ Kolem Musa aokot kobwatanak otuŋa, kobala ebe, “Koanyutu aokot nuka aitutuket, naetutuk EJAKAIT kayes kotoma akiro nu kere.”

⁹Kosodete Musa ka Aaron, ka Nadab, ka Abiku adokar, ka akaisakanykaarei komakio luka Isirael:

¹⁰ Koanyut kesi Edeke loka Isirael; kwap kakejeke kosubite bala aswam naka amor nuepesitai nuka asapiro, nueputos aipioror naka akuj alopet.

¹¹ Kwabo mam ibwaikina akekan mama kalukapolok luka idwe luka Isirael; koanyut Edeke, konyama komata.

¹² Kotema EJAKAIT Musa atiar, “Kodoku moru mama ajai, kiboi kaŋina: kainakini jo amor nuewadikat, ka ikisila ka aicorakineta, tetere isisianakini kes.”

¹³ Konyou Musa ka Yosua ekekejaanakinan: kodoka Musa moru loka Edeke.

¹⁴Kotema ŋesi imakio atiar, “Kidareunai sio kane, aitodol nekibonunio mama ijaas; ido koany, Aaron ka Kur ejaas nepepe kayes; ŋinituŋanan yenejai akirot, kolot mama ejaas.”

¹⁵ Kodoka Musa moru, korapia edou emoru.

¹⁶ Kojai aibuses naka Edeke moru Sinai, korapia edou emoru apaarasia akanykape: kapaaran nakikanyetekaarei konyara ŋesi Musa kokidiŋ odou.

¹⁷ Aputo naka aibuses naka EJAKAIT kosubite kakonyen nuka idwe luka Isirael bala akim naesarani noi kokuju moru.

¹⁸ Koloma Musa kidiŋ odou, kodoka moru: kodau Musa komoru apaarasia akaisaoŋon paaran ka kuare.