Read Ebaibuli 1961 Anyoun 27 Bible Online

Anyoun 27 - Ebaibuli 1961 bible

Anyoun 27

¹ “Iswamauni etem loka akito nuka sita, aojauke ikubitin [17] ikany, alalau ikubitin ikany: korai etem loka agoria aoŋon nueriakanara: akemukurur da korai ikubitin iuni.

² Iswamauni da akemumwara kuju kagoriake aoŋon: koraas akemumwara nuka ibore idiopet kaŋes: iladaari ŋes kaisinit.

³ Iswamauni da atubake nuigaete ekurwon, ka initiake ka atanyake, ka igolunake luka akiriŋ, ka ekekiala: iswamauni ikeboro ŋul kere kaisinin.

⁴Iswamakini da etem eboi loka aisinit; ibwaikini ipetai iwoŋon luka aisinin toma agoria aoŋon nuka eboi.

⁵Ibwaikini eboi ŋol kwap kapama nairimorit etem kokwap, tetere edoli eboi kiduj osiepion luka etem.

⁶Ikeuni akito kanuka etem, nuka akito nuka sita, iladaari kes kaisinit.

⁷ Irupakinio akito ŋun toma opetai, ejaunos akito ŋun osiepion iarei luka etem adakia.

⁸ Kiswama etem kabaoi koorori kotoma: kwape kitodikinitere komoru, kwaŋin ŋes iswamauniata.

⁹ “Iswamauni alaro naka ewema: kowai loka eŋalakimak ari naka eŋalakimak ejaunos igoen luigalitoi luka ebaputa loecipitai kiusio lueriim, aojauke kowai ediopet korai ikubitin akwatat.

¹⁰Koraas ikepirin akaisaarei, aigaŋetakec da akaisaarei nuka aisinin; igolun luka ipirin ka aikajetakec koraas nuka epuesa.

¹¹Kwape kwaŋin owai loka agolitomei ejaunos igoen luigalitoi, aojaukec ikubitin akwatat ka ipirinokec akaisaarei, ka aigaŋetakec akaisaarei, nuka aisinin; igolun luka ipirin ka aikajetakec koraas nuka epuesa.

¹²Kanuka alalau naka alaro kowai lokoto ejaunos igoen luigalitoi aojaukec ikubitin akaisakany: ikecepirin itomon, ka aigaŋetakec atomon.

¹³Alalau da naka alaro kowai lokokide kari nakokide eraun ikubitin akaisakany.

¹⁴Igoen luigalitoi lukowai ediopet loka erute eraunos ikubitin itomon ka lukany: ipirinokec iuni, aigaŋetakec auni.

¹⁵Ido kowai ece ejaunos igoen luigalitoi luka ikubitin itomon ka lukany; ipirinokec iuni, aigaŋetakec da auni.

¹⁶Ido kanuka erute loka alaro ejaun aigalisit naka ikubitin akaisaarei, lobululu, lomuge, ka Lokareŋan, ka ebaputa loecipitai kiusio lueriim, aswam naka ekasonyan: ipirinokec iwon on, aigaŋetakec da aoŋon.

¹⁷Ipirin kere luka alaro luirimorito ejaunos aikajeta nuka epuesa: igolunakec luka epuesa, ka aigaŋetakec nuka aisinin.

¹⁸Aojau naka alaro eraun ikubitin akwatat, alalauke da kere ikubitin akaisakany, amukurur ikubitin ikany, nuka ebaputa loecipitai kiusio lueriim, ka aigaŋetakec nuka aisinin.

¹⁹Iboro kere lukowema ka aijaanakinike kere, ka iloinoke kere, ka iloin kere luka alaro, eraunos luka aisinin.

²⁰ “Ido icorakini idwe luka Isirael, koinutu akinyet naejok naka eseitun naerukuk kanuka aica, aitonokia atala tiritir.

²¹ Kotoma owema loka airiamunun kiŋa kaigalisit naejai iŋaren kaitejenunet, itemonokinete Aaron ka odweke ageun eboŋ aitodol tupuruc kakonyen nuka EJAKAIT: eraun ekisil apaarasia kere anatar aturiokec kodwe luka Isirael.