Read Ebaibuli 1961 Anyoun 28 Bible Online

Anyoun 28 - Ebaibuli 1961 bible

Anyoun 28

¹ “Kisukuny ijo Aaron onacekon, ka odweke nepepe kaŋes, kodwe luka Isirael, kejaanak eoŋ kosasedotene, Aaron, ka Nadab ka Abiku, ka Eleasar ka Itamar, odwe luka Aaron.

² Ido iswamakini onacekon Aaron inapen lukalaunak, kanuka aibuses ka ajokis da.

³ Ilimokini kere luejaas itauon luka apirianut, lueteleleb eoŋ kemoyo loka acoa, kiswamata inapen luka Aaron aitalaunia ŋes, kejaanak eoŋ kosasedotene.

⁴Lu kes inapen luiswamaunete kesi; yenikatorob, ka epod,[18] ka ekaso, ka ekooti loocerer, ka egoe lokieniena akou, ka aenetait naka aŋabet: iswamakinete Aaron onacekon ka odweke inapen lukalaunak, kejaanak eoŋ kosasedotene.

⁵“Eyaŋaarete esabu, ka lobululu, ka lomuge, ka Lokareŋan, ka ebaputa loejok.

⁶ Iswamaunete kesi epod loka esabu, ka lobululu, ka lomuge, ka Lokareŋan, ka ebaputa loecipitai kiusio lueriim, aswam naka ekeswaman kaloepiriana.

⁷Ejaunos lukokeperin iarei luimorikikinitai kosanetakec iarei; tetere imorikikina.

⁸Aenet da naicipitai kapirianut, naejai tomake aenia, koputos akeswam kaswam naka egoeke; loka esabu, ka lobululu, lomuge, lokareŋan, ka ebaputa loecipitai kiusio lueriim.

⁹Ido iyaŋaari amor aarei nuemelomeloto, kigiranak nen ikiroria luka idwe luka Isirael.

¹⁰Ikiroriakec ikanykape amoru adiopet, ka ikiroria ikanykape luesalitos amoru nakiareit, kwape ejaar auriokec.

¹¹Aswam naka ekegiran amor, kwape igiria emacar, ŋes igiria ijo amor ŋun aarei kwape ejaatar ikiroria luka idwe luka Isirael: ilukuni kes kapesan nuka esabu.

¹² Ibwaikini da amor ŋun aarei okeperin luka epod, araun amor nuka aisiitunet kanuka idwe luka Isirael: edakari Aaron ikiroriakec akonyen nuka EJAKAIT kokeperinike iarei araun aisntunet.

¹³Iswamauni da apesan nuka esabu:

¹⁴Ka irikoi iarei luka esabu kaloelai; iswamauni kwape kaunoi, kaswam kanaeojitoi: ienikini da irikoi lueojitoi toma apesan.

¹⁵ “Ido iswamauni yenikatorob yeniketube, aswam naka ekeswaman kaloepiriana: iswamauni kwape kaswam naka epod; yenika esabu, ka yenibululu, ka yenimuge, ka yenikareŋan, ka ebaputa loecipitai kiusio lueriim, iswamauni ŋes kwaŋin.

¹⁶Eraun yenika agoria aoŋon nueriakanara, ekudokinitai bala eriagi, aojauke eraun atutubet naka ekubit, alalauke da atutubet naka ekubit.

¹⁷ Ido ipiripiranakini amor nekiminaikina, ikokoron iwoŋon luka amor: ekokoro loka asadia, * ka atopasit, * ka karubunikol * ŋes eraun ekokoro losodit;

¹⁸Ekokoro lokiareit loka emeralid, * ka asapiro, * ka diamod*;

¹⁹Ekokoro lokiwuniet loka eyasit, * ka aget,* ka ametusit*;

²⁰Ka ekokoro lokiwoŋonet loka aberul, * ka naemelomelot, * ka ayaseper[19]; elukunio esabu loiminaikinere.

²¹ Eraunos amor kwape ejaatar ikiroria luka idwe luka Isirael, atomon ka nuarei, kwape ejaatar ikiroriakec; kwape igiria emacar, ŋinituŋanan kwape ejaar ekekiror, eraunos kanuka atekerin atomon ka nuarei.

²²Ido ibwaikini toma yenikatorob irikoi kwape kaunoi, luka aswam naeojitoi naka esabu kaloelai.

²³Ibwaikini da igilun iarei luka esabu toma yenikatorob, ibwaikini igilun ŋul iarei osaŋeta iarei luka yenikatorob.

²⁴Ibwaikini irikoi iarei luka esabu lueojitoi toma ogilun iarei lukosaŋeta luka yenikatorob.

²⁵Ibwaikini isaŋeta ice luka irikoi ŋul luarei lueojitoi toma apesan kwa aarei, kosodi aibwaikin okeperin luka epod, kowaike lokoiŋaren.

²⁶Iswamauni da igilun iarei luka esabu, ibwaikini toma osaŋeta iarei luka yenikatorob, toma atokitoitike, naejai owai lokotoma loka epod.

²⁷Iswamauni igilun iarei luka esabu, kosodi aibwaikin toma atutubeta aarei nuka ikeperin luka epod kwapuke, kowai lokoiŋaren, eiduny kaimorikikinetake, kuju aenet naka epod naicipitai kapirianut.

²⁸Eenikinete igilun luka yenikatorob ka igilun luka epod keusi lobululu, tetere iboie kokuju aenet naka epod naicipitai kapirianut, tetere mam yenikatorob ilajakin kepod.

²⁹ Ido enapenenei Aaron ikiroria luka idwe luka Isirael kotoma yenikatorob yeniketube kotauke, naelomanaria aibois nakalaunan, araun aisiitunet natir kakonyen nuka EJAKAIT.

³⁰ Ibwaikini Urim ka Tumim [20] toma yenikatorob yeniketube; ejaununos otau loka Aaron, naelomanaria akonyen nuka EJAKAIT: enapenenei Aaron etube loka idwe luka Isirael kotauke tiritir kakonyen nuka EJAKAIT.

³¹ “Iswamauni ekaso loka epod korai kere lobululu.

³²Ejaun apedot kotomake neitori akou: ejaun atokitoit p-aka aswam naicipitai airimor apedotoke, kwape kapedot naka ekooti loka acuma, kinyek acilio.

³³Toma atweleike iswamakin akamamagan nuka lobululu, ka lomuge, ka Lokareŋan, airimor atwelei kere; ka icirin luka esabu kidiŋikec airimor:

³⁴Ecirit loka esabu ka akamamaga, ka ecirit loka esabu ka akamamaga, airimor atwelei nuka ekaso.

³⁵Ido enapenenei Aaron aijaanakinia: iiranario da aruokec naelomanaria aibois nakalaunan akonyen nuka EJAKAIT, naelomununia da, kinyek atwanare.

³⁶ “Iswamauni amekemeket nakesabu kaloelai, kigirak ŋes, kwape igiria emacar ebe, IKALAUNAN YENIKA EJAKAIT.

³⁷Ieni keusi lobululu, ido ejaun ogoe lokieniena akou; ejaenena kiŋaren kegoe lokieniena akou.

³⁸ Ido ejaenena oreet loka Aaron, ibwokenenei Aaron numam adolit nuka iboro lukalaunak, luitalaunete idwe luka Isirael kotoma ainakinetakec kere nukalaunak; ejaenena oreet loka Aaron apaarasia kere, tetere ecamunio kes kakonyen nuka EJAKAIT.

³⁹“Icipuni ekooti locerer loka ebaputa kaloejok, iswamauni da kebaputa kaloejok egoe lokieniena akou, iswamauni aenetait naka aŋabet, aswam naka ekasonyan.

⁴⁰ “Ido iswamakini idwe luka Aaron ikootin, iswamakini kes aeneta nuka aŋabes, akopiran da iswamakini kes, kanuka aibuses ka ajokis.

⁴¹ Itanapi kes Aaron onacekon, ka odweke; inyonyoikini kes akinyet, itiakuni kes, italauni kes, tetere kejaanakinete eoŋ kosasedotene.

⁴² Iswamakini kes ipalei luka ebaputa arapakinia awatekec nuejaas titai; egeunete kanabes kiton amurwos:

⁴³ Enapenenei Aaron, ka odweke, naelomanariata toma owema loka airiamunun, arai naikunyakiniata otem aijaanakin kotoma aibois nakalaunan; tetere mam ibwokete numam adolit, kosodete atwakare: eraun ekisil kamake ka aurike naetupanakini ikar kere.