Read Ebaibuli 1961 Anyoun 3 Bible Online

Anyoun 3 - Ebaibuli 1961 bible

Anyoun 3

¹ Ecokie Musa esipan loka ekamuranike Yetero, esasedoti loka Midian: komea esipan kau kamodiŋ, kodol moru loka Edeke, Koreb.

² Kitaanyikin emalaika loka EJAKAIT Uŋes, kotoma aŋajep naka akim kokidiŋ kekiot: kosesen, ido koany, anoki akim kokiot, komam ekiot idopori.

³ Kobala Musa ebe, “Kamana ber, kaany akirot na naepol, namam ekiot idoporia.”

⁴ Keanyu EJAKAIT ŋes emanuni aanyun, konyarau Edeke Uŋes kokidiŋ okiot kiner ebe, “Musa, Musa.” Kii ebe, “Eoŋ lo.”

⁵ Kobala ebe, “Sirikikuny ne: kolaca akonimuk kakejenekon, naarai aibois naibwoia erai akwap nakalaunan.”

⁶ Kiner bobo ebe, “Eoŋ Edeke loka papakon, Edeke loka Aburaam, Edeke loka Isaak, Edeke loka Yakob da.” Kibwa Musa akekonyen; naarai abu koyoŋ asesen Edeke.

⁷ Kiner EJAKAIT ebe, “Aany cut aiticanio naka ikatuŋa luejaas Misiri, eira akeceimony kanuka ŋul kaluitwasamaete kes; naarai ajeni ikececan:

⁸ Adokunit ayuun kes kakan naka Imisirian, aitonyoun kes kakwap kaŋin aitolomar akwap naejok, naelal, akwap naeleleete akile ka esik; aibois naka Ekanaanit, ka Ekitit, ka Emorait, ka Eperisit, ka Ekibit, ka Eyebusit.

⁹ Aso koany, kadoloki aimony naka idwe luka Isirael: bobo da aany aroikinit naeroikinitotor Imisirian kes.

¹⁰ Bia do, keyakia neejai Parao, kitolom ikatuŋa idwe luka Isirael koMisiri.”

¹¹ Kobala Musa Edeke ebe, “Iŋai bo eoŋ, loalosi neejai Parao? aitolomun idwe luka Isirael koMisiri?”

¹² Kotema atiar, “Abeit ajaenena Eoŋ kajo; ido na ŋes aanyunet nakitejenuni jo ebe Eoŋ keyakiarit: naidaunia aitolomun ituŋa ŋul koMisiri, ijaanakinete Edeke komoru kalo.”

¹³ Kotema Musa Edeke ebe, “Koany, naadolokinio eoŋoŋ idwe luka Isirael, kalimokin kes ebe, ‘Edeke loka lukapapaakus ŋes keyakunit mama ijaas yesi’; kes da keŋisete eoŋ ebe, ‘Ekekiror iŋai?’ alimokini kes biai?”

¹⁴ Kobala Edeke Musa ebe, “AJAI KWAPE AJAAR.” Kobala ebe, “Ilimokini idwe luka Isirael ebe, ‘AJAI ŋes keyakunit mama ijaas.’ ”

¹⁵ Kobala Edeke Musa ebe, “Ilimokini idwe luka Isirael ebe, ‘EJAKAIT, Edeke loka lukapapaakus, Edeke loka Aburaam, Edeke loka Isaak, Edeke loka Yakob da, ŋes keyakunit mamakus’: ŋol ŋes ekakiror ikar kere, ŋin da ŋes aiituneteka anatar aturio kere.

¹⁶ Kolot, kotukonok imakio luka Isirael nepepe, kolimok kes ebe, ‘EJAKAIT, Edeke loka lukapapaakus, Edeke loka Aburaam, loka Isaak, loka Yakob da, ŋes abu ketaanyikinkobala ebe, “Abeit kaanyana yes, aany nukiswamanakinio koMisiri:

¹⁷ ŋes abalar atiar, Ketolomuni yes kaiticanio naka Misiri alomar akwap naka Ekanaanit, ka Ekitit, ka Emorait, ka Eperisit, ka Ekibit, ka Eyebusit, akwap naeleleete akile ka esik.” ’

¹⁸ Iirarete ekoniporoto: ibuni ijo ka imakio luka Isirael, mama ejai ekabaka loka Misiri ilimokinete ebe, ‘Abu EJAKAIT, Edeke loka Iburanian keriamunos kasio; aso keŋaiŋait, kisiikinai kaloto alosit naka apaarasia auni toma amodiŋ; ainakin asuban neejai EJAKAIT Ekosideke.’

¹⁹Ajeni kojokan ebe, mam ekabaka loka Misiri kisiikini yes alosit, eebo, karaida kakan nakagogoŋ.

²⁰ Ariori eoŋ da akakan, kasodi aidany Misiri kere kaumokinetaka kere nueswamai kokidiŋikec: kokau kaŋun kisiikini yes alosit.

²¹ Ido ainilini ituŋa ŋul aminunio kakonyen nuka Imisirian: aso nainyounioto, mam inyounete atitai:

²² Konye ilipi ŋiniberu akeidunyet, ka ŋin da naiboie kotogoke, iboro luka epuesa ka iboro luka esabu, ka igoen: isirete ikusidwe lusap ka lupesur; ido iŋasete Imisirian.”