Read Ebaibuli 1961 Anyoun 30 Bible Online

Anyoun 30 - Ebaibuli 1961 bible

Anyoun 30

¹ “Iswamauni etem lokisupuruunet lukisupurununo: iswamauni ŋes kakito nuka sita.

²Aojauke eraun ekubit, [22] alalauke da ekubit; eraun loka agoria aoŋon nueriakanara: amukururuke ikubitin iarei: amumwarake eraunos nuka ibore idiopet kaŋes.

³Iladaari ŋes kesabu loelai, kujuke, ka isiepionoke, ka amumwarake; iswamakini ŋes atorosit naka esabu airimor.

⁴Iswamakini ŋes igilun iarei luka esabu kwap katorositike, amaranake aarei, iswamakini kes osiepionoke iarei; eraunos aiboisio nuka adaketa adakia ŋes.

⁵Iswamauni adaketa nuka akito nuka sita iladaari kes kesabu.

⁶Ibwaikini ŋes kiŋaren kaigalisit naejai eiduny kasaduku naka aitejenunet, kiŋaren keicoloŋ-lokaitim loejai kuju kaitejenunet, nekiriamun kajo.

⁷Isupuruuni Aaron kanen lukisupurununo luka lueuru maa: ŋinitupuruc, naitemonokinio ŋesi atalai isupuruuni kes.

⁸Nainokokinia Aaron atalai eboŋ, isupuruuni kes, lukisupurununo lumam edaunos kakonyen nuka EJAKAIT anatar aturiokus.

⁹ Mam isupuruunete lukisupurununo luegelakina kanen, karaida ainakinet naicweio, karaida ainakinet naka akiria; mam ibukokinete ainakinet namatat nen.

¹⁰ Eluci Aaron amumwara nuka etem irwan atipet ŋolikaru: kaokot nuka ainakinet naka adiakaret eluci ŋes atipet ŋolikaru anatar aturiokus: erai lokalaunan noi kama ejai EJAKAIT.”

¹¹Kotema EJAKAIT Musa atiar,

¹² “Naimaria ijo etiai loka idwe luka Isirael, kwape ejaatar ŋul luimarar kakesi, einakini ŋinituŋanan EJAKAIT lulakunete aijarake, naimaria ijo kes; tetere mam ejaun atular mamakec naimaria ijo kes.

¹³ Yen ŋes yeneinakini ŋinituŋanan yenetubori mama ejaas luimarar, atutubet naka esekel [23] kwape ejaar esekel loka aibois nakalaunan, (esekel ŋes igeran akaisaarei:)

¹⁴Ŋinituŋanan yenetubori mama ejaas luimarar ageun kaluka ikar akaisaarei ka luedeparito einakini ainakinet naka EJAKAIT.

¹⁵ Mam ikabarak einakinete luedeparito, lukican da mam einakinete luikidioko, adepar atutubet naka esekel, naeinakiniata ainakinet naka EJAKAIT, alucio akusiijar.

¹⁶ Ijauni apesan nuka alucio kama ejaas idwe luka Isirael, itwasamai kes aijaanakinia kowema loka airiamunun; tetere eraun aisiitunet kanuka idwe luka Isirael kakonyen nuka EJAKAIT, alucio akusiijar.”

¹⁷Kotema EJAKAIT Musa atiar,

¹⁸ “Iswamauni akalaya naka aisinit, aigaŋeteke naka aisinit, ailonia: ibwaikini ŋes kidiŋ kewema loka airiamunun ka etem, ibukokini akipi toma.

¹⁹ Ilosete Aaron ka odweke akecekanin ka akecekeje kanen;

²⁰Naelomanariata owema loka airiamunun, ilosete kakip, tetere mam etwakete; arai naekunyuniata otem aijaanakin, aicwe ainakinet naeinakinere kakim mama ejai EJAKAIT:

²¹ Ilosete akecekanin ka akecekeje tetere mam etwakete: eraun ekisil kamakec ikar kere, kamake ka aurike anatar aturiokec.”

²² Kotema bobo EJAKAIT Musa atiar,

²³ “Kolem lueuru maa jokan, emina loecalara isekelin akwat akany, akinomon naewiny atutubet naka ŋol, ŋes akwat aarei ka akaisakany, akalamus da naewiny akwat aarei ka akaisakany.

²⁴ Luka ekasia da akwat akany kwape ejaar esekel loka aibois nakalaunan, ka ekin[24] loka akinyet naka eseitun:

²⁵ Itarauni ŋes akinyet nakinyonyoanakina nakalaunan, aures nainyalitai kwape ejaar apirianut naka ekenyalan lueuru maa: eraun akinyet nakinyonyoanakina nakalaunan.

²⁶ Inyonyoanakini ewema loka airiamunun, ka asaduku naka aitejenunet.

²⁷Ka emesa ka iboroke kere, ka epir loka atala: ka ikeboro kere, ka etem loka lukisupurununo.

²⁸Ka etem loka ainakinet naicweio ka iboroke kere, ka akalaya ka aigaŋeteke.

²⁹Italauni ijo kes, koraut lukalaunak noi: yenetirori kes eraun yenikalaunan.

³⁰Inyonyoanakini Aaron ka odweke akinyet, italauni da kes, tetere kejaanakinete eoŋ kosasedotene.

³¹Ilimokini idwe luka Isirael ebe, ‘Eraun na akinyet nakinyonycanakina nakalaunan kamaka anatar aturiokus.

³²Mam ebukokinio akuan naka ituŋanan, karaida yes aiswamaun naeputotor, kwape ejaar eiponeke: erai nakalaunan, eraun da nakalaunan kamakus.

³³ Ŋinituŋanan yeniswamauni naeputotor, arai ŋinituŋanan yeninyonyoikini ŋes emoit, egelario kotuŋake.’ ”

³⁴ Kotema EJAKAIT Musa atiar, “Koya lueuru maa, esitakite, ka onika ka egalubanum; lueuru maa ka lukisupurununo luelaete: koriakas alanirukec kere;

³⁵Iswamaunia ijo kes lukisupurununo, aures nainyalitai kwape ejaar apirianut naka ekenyalan lueuru maa, kitijijimitete kabalaŋ, naelai nakalaunan:

³⁶ Iruki ice kakesi aidecar, ibwaikini da kiŋaren kaitejenunet kowema loka airiamunun, nekiriamuni kajo: eraunos lukalaunak noi kamakon.

³⁷Lukisupurununo luiswamauni ijo kwape ejaar eponekec, mam iswamaunete kanukus: eraunos lukalaunak kamakus kanuka EJAKAIT.

³⁸Ŋinituŋanan yeniswamauni lueputotor, ainuunun, egelario kotuŋake.”