Read Ebaibuli 1961 Anyoun 32 Bible Online

Anyoun 32 - Ebaibuli 1961 bible

Anyoun 32

¹ Keanyut ituŋa ebe eyap Musa adokun komoru, kotukonokinos mama ejai Aaron, kobalas ŋes ebe, “Konyou, kiswamakinai sio idekesio, lukiŋarenikinete; naarai Musa ŋol, ekesa lokitolomuni sio kakwap nako Misiri, mam kijeni nuadoikis ŋes.”

² Kobala Aaron kes ebe, “Koijedununutu itetio luka esabu, luejaas aki nuka aŋorokus, ka luejaas aki nuka idwekus lutelepai ka lupesur da, koinut eoŋ.”

³Koijedununut ituŋa kere itetio luka esabu luajaas akikec, koinut Aaron.

⁴ Kijau kakaninikec, kiluŋuluŋ kacuma kanaigiri, kosub itaok yenicaluna; kobalas ebe, “Lu kes idekesiokon, ijo Isirael, lukitolomunete kakwap nako Misiri.”

⁵ Keanyu Aaron ŋun, kodukok etem akonyeneke; kolimo Aaron ebe, “Ejaun moi epucit mama ejai EJAKAIT.”

⁶ Konyout tupuruc sek, koinanakis ainakineta nuicweio, koyaut ainakineta nuka ainapakin; kiboikinos ituŋa ainyam ka aimat, konyout abolia.

⁷ Kotema EJAKAIT Musa atiar, “Kolot kijesar; naarai amunaaros ituŋakon luitolomuni kakwap nako Misiri:

⁸ Apaasi atipet anyoun korot loabu kecorak kes: asubut itaok venicaluna, amaata ŋin, ainakis da asubanit, kobalas ebe, ‘Lu kes idekestokon, ijo Isirael, lukitolomunete kakwap nako Misiri.’ ”

⁹ Kotema EJAKAIT Musa atiar, “Aany eoŋ ituŋa lu, ido koany, kes ituŋa lueninik imurisiŋa;

¹⁰ Aso do kinyeinai, tetere inepuni noi anyunyuraka aluikin kes, tetere amudiari kes: ketuluori jo ateker naepol.”

¹¹ Kiŋaiŋa Musa EJAKAIT Ekedeke, kobala ebe, “EJAKAIT, kanukinyo inepunia noi anyunyurakon aluikin ituŋakon, lukitolomuni kakwap nako Misiri kagogoŋ naepol kakan da naka apedor?

¹²Kanukinyo ti elimunioto Imisirian ebe, ‘Abu kitolom kes kanuka aronis, aarakin kes oroŋan, amudiar kes kakwap’? Kinyek anyunyurakon naededeŋ, kiitu ikonituŋa kinyeik aronis ŋin.

¹³ Kiitu Aburaam, ka Isaak ka Isirael, ikonikejaanakinak, luibu kiyapok bon kobala ebe, ‘Eyatakini eoŋ aurikus kwape kaacer nukokuju, akwap ŋin kere naener nuke, ainakini aurikus, irumete kesi ikar kere.’ ”

¹⁴ Kiitu EJAKAIT kinyek aiswamakin ituŋake aronis naabala.

¹⁵ Kibelokin Musa kijesar komoru, kojaas kamor aarei nuka aitejenunet akaninike; amor nuewadikatai owaitinikec kere; ewadikatai epuai ka epuai da.

¹⁶ Araas amor aswam naka Edeke, aiwadika da arai aiwadika naka Edeke, naegirakinitai amor.

¹⁷Kepupu Yosua ecelet loka ituŋa eutaritos, kobala ŋesi Musa ebe, “Ejai ecelet leka ejie toma oidukurun.”

¹⁸Kobala Musa ebe, “Mere ŋol eporoto loka ŋul kaluecelas kanuka aipikor, karaida eporoto loka ŋul kaluemonyete kanuka aireŋeario: konye apupi ecelet loka ŋul kalueyoete.”

¹⁹Kosodi nape eapiari oidukurun, koany itaok ka ekosio: kinep noi anyunyura naka Musa, kocaka amor kakaninike, kobwanak kes kwap kemoru.

²⁰Koyaŋa itaok yenasubunito, kicweik kakim, kidecidec, kipurupuranak akipi, kiramat idwe luka Isirael.

²¹ Kobala Musa Aaron ebe, “Apotu ituŋa kikwaikis jo ai, tape iyauni adiakaret naepol mamakec?”

²² Kobala Aaron ebe, “Kinyek anyunyura naka ejakaitika ainepun noi: ijeni ijo ituŋa, etupitos cut aronis.

²³Naarai apotu katemasi eoŋ ebe, ‘Kosubakinai idekesio, lukinarenonokinete oni, naarai Musa ŋol, ekesa lokitolomuni oni kakwap nako Misiri, mam kijeni nuadoikis.’

²⁴Katema kes ebe, ‘Yenejai esabu kere, konedununutu’; kwaŋin apotu kainut: kebwaik akim, kolom do itaok yen.”

²⁵ Kosodi keanyu Musa ebe epaliikis ituŋa; naarai abu Aaron kisipaliik kes araun luekienatatar lukasurupokec:

²⁶Kosodi Musa aibwo korute loka iidukurun, kobala ebe, “Ŋinituŋanan yenejai owai loka EJAKAIT kobu mama ajai.” Kotukonokinos odwe kere luka Lebi mama ejai.

²⁷ Kobala ŋesi kes ebe, “Ebala EJAKAIT, Edeke loka Isirael kwanata ebe, ‘Kibwaik ŋinituŋanan ekekileŋ amurwoke, koboŋoboŋoto kokekia kere anatar iidukurun kere, koar ŋinituŋanan onaceke, ŋinituŋanan aupake, ŋinituŋanan ekeidunyet.’ ”

²⁸Kiswamata odwe luka Lebi kwape ajaar akirot naka Musa: kotwaka kapaaran kaŋin kotuŋa, ituŋa kwape ilukumin iuni.

²⁹Kobala Musa ebe, “Kotiakunos lolo mama ejai EJAKAIT, ŋinituŋanan ka ikekoku, ka onaceke; tetere ŋes kisirereŋi yes lolo.”

³⁰ Kosodi kedolo tupuruc kobala Musa ituŋa atiar, “Idiakasi aronis naepol: kwape kwana adokari eoŋ mama ejai EJAKAIT: diat aluci akusironis.”

³¹Koboŋo Musa mama ejai EJAKAIT, kobala ebe, “Wu okwe, adiakas ituŋa ŋul aronis naepol, asubut ikulepek idekesio luka esabu.

³² Konye kwana, arai kisioni ijo aronisikec; konye arai mam, keŋaiŋait, komwatarai eoŋ koitabokon loibu kiwadik.”

³³ Kobala EJAKAIT Musa ebe, “Ŋin kere yenadiakaa kamakaŋ, ŋin ŋes amwatari koitaboka.

³⁴ Aso kolot, kiŋarenik ituŋa aibois naalimokinit jo; koany, kiŋarenikinenei ekamalaika jo; konye kapaaran naaanyanaria, aanyuni aronisikec.”

³⁵ Kodany EJAKAIT ituŋa, naarai apotu kosubata itaok yenabu Aaron kosub.