Read Ebaibuli 1961 Anyoun 33 Bible Online

Anyoun 33 - Ebaibuli 1961 bible

Anyoun 33

¹ Kotema EJAKAIT Musa atiar, “Konyoutu koloto kane, ijo ka ituŋa lukitolomuni kakwap nako Misiri, kolomasi yesi akwap nakolo esiyapokinit eoŋ Aburaam, ka Isaak, ka Yakob ebe, ‘Ainakini akoniwur.’

² Ido eyakuni emalaika koinarenikon; ereŋeari da Ekanaanit, ka Emorait, ka Ekitit, ka Eperisit, ka Ekibit, ka Eyebusit da:

³ Kakwap naeleleete akile ka esik: naarai mam eoŋ kiupakin kayes; naarai iraas yesi ituŋa lueninik imurisiŋa: kenyek amudiar yes korot.”

⁴ Kepuput ituŋa akiro ŋun nueroko, kitururwoto; komamuun ituŋanan yenisirit akekuan.

⁵ Kotema EJAKAIT Musa atiar, “Kolimok idwe luka Isirael ebe, ‘Iraas yesi lueninik imurisiŋa: arai kiupakin eoŋ kayes karaida apak naedit noi, kamudiari eoŋ yes: aso do kolaca luisirito, kasodi konyet ajenun nukeswamakini yes.’ ”

⁶Kolacasi idwe luka Isirael luesirito kesi ageun komoru Koreb kaiyatakin.

⁷ Ayananari Musa ewema asiponokin kiŋa kiidukurun; kolwanikina koidukurun; komaik Ewema loka airiamunun. Kosodi ŋinituŋanan yenekoto EJAKAIT alosenen owema loka airiamunun, loajai kiŋa kiidukurun.

⁸ Kosodi naelomanaria Musa owema, anyoununete ituŋa kere, kobwo ŋinituŋanan kokek loka ewemake, asesen Musa aitodol neelomaria owema.

⁹ Kosodi kanen, naalomanaria Musa toma owema, kijesunun epir loka edou, kobwo kokek loka ewema: kinerakinos EJAKAIT ka Musa.

¹⁰Koanyut ituŋa kere epir loka edou ebwoi kokek loka Ewema: konyout ituŋa kere komaata, ŋinituŋanan kokek loka ewemake.

¹¹ Kinerenenas EJAKAIT kaMusa kiteos, kwape ineratar etuŋanan kopaperoke. Koboŋonori bobo ŋesi oidukurun: konye ekekejaanakinan Yosua, okoku loka Nun, ekatumunan, mam anyoununei koWema.

¹² Kotema Musa EJAKAIT atiar, “Koany, ibala ijo eoŋ ebe, ‘Koyaŋa ituŋa lu’: ido mam kitejenikinit eoŋ lokiyakiari keoŋ, Konye ibu ijo kiner ebe, ‘Kajeni jo kekonikiror, ibu da kodum asianut kakonyeneka.’

¹³ Kanuka ŋun, keŋaiŋait, arai adumunit asianut kakonyenekon, kitodikinai ikonirotin, tetere kajenuni jo, kasodi adumun asianut kakonyenekon: ido koomoom ebe erai ateker na ikonituŋa.”

¹⁴ Kotema ŋes atiar, “Ajaenena eoŋ kajo, eoŋ da kesiyenuni jo.”

¹⁵ Kotema ŋes atiar, “Arai mam ijaenena keoŋ, sirikiiyaŋa sio ŋina.

¹⁶ Naarai ikwaikinio ai ejenunio ebe abu eoŋ kadum asianut kakonyenekon, eoŋ ka ikonituŋa da? Mere ti ŋes ejenunere naarai iupa ijo kasio, kasodete atiakunio, eoŋ ka ikonituŋa, kotoma otuŋa kere luejaas akwap?”

¹⁷ Kotema EJAKAIT Musa atiar, “Eswamai ŋin da nainer ijo; naarai ibu kodum asianut kakonyeneka, eoŋ da kajeni jo kekonikiror.”

¹⁸ Kobala ebe, “Keŋaiŋait, kitodik eoŋ akoniibuses.”

¹⁹ Kotema atiar, “Etotori akajokis kere akonyenekon, alimori da ekiror loka EJAKAIT kakonyenekon; ido ekonakini asianut ŋin yenakoto aikonakin asianut, etimi da yenakoto aitim.”

²⁰ Kobala ebe, “Mam ipedori aanyun akakonyen: naarai mam ituŋanan kaanyuni eoŋ kosodi aijar.”

²¹Kobala EJAKAIT ebe, “Koany, ejai aibois naeapie keoŋ, ibwoi ijo katiiba:

²² Kosodi naitorio aibusesuka, kepiikini jo toma acilat naka atiiba, arapakini jo kakakan aitodol neatuboror eoŋ:

²³ Alemari akakan, ianyuni ijo epuraka; konye akakonyen mam eanyunos.”