Read Ebaibuli 1961 Anyoun 35 Bible Online

Anyoun 35 - Ebaibuli 1961 bible

Anyoun 35

¹ Kotukok Musa ekodet kere loka idwe luka Isirael, kotema kes atiar, “Nu kes akiro nuecoraki EJAKAIT, tetere yes iswamaete.

² Iswamao aswam apaarasia akanykape, konye eraun apaaran nakikanyetekaarei apaaran nakalaunan kamakus, nakasabato naka aibworar mama ejai EJAKAIT: yeniswamai adioswam kere kapaaran kaŋin eario.

³ Sirikisineput akim kaiboisiokus kere kapaaran naka asabato.”

⁴ Kiner Musa kekodet kere loka idwe luka Isirael atiar, “Na ŋes akirot naabu EJAKAIT kicorak ebe,

⁵ ‘Kijaikisi yesi ainakinet mama ejai EJAKAIT: ŋinituŋanan yenejai etau loekot, koyau ainakinet naka EJAKAIT: esabu ka epuesa ka aisinit.

⁶Lobululu, ka lomuge, ka lokareŋan, ka ebaputa loejok, ka ajul nuka akinei;

⁷Ka imukulen luka imerekekin luitereŋitai, ka imukulen luka itakasin,[25] ka akito nuka sita;

⁸Akinyet naka atala, ka lueuru maa luka akinyet nakinyonyoanakina; ka luka lukisupurununo;

⁹Amor nuemelomeloto, ka amor nuipiripiranara aibwaikin opod,[26] ka yenikatorub da.’

¹⁰ “Kobu ŋinituŋanan kere yenepiriana kotau, kiswama kere nuecoraki EJAKAIT:

¹¹ Ewema lokalaunan, ewemake, ka eimukoreteke, ka arucetake, II ka abaoike, ka ariinoke, ka ipirinoke, ka aigaŋetake;

¹² Asaduku, ka adaketake; eicoloŋ-lokaitim, ka aigalisitike;

¹³ Emesa, ka adaketake, ka iboroke kere, ka imugatin luka aitodikin;

¹⁴ Epir da loka atala, ka iboroke, ka atalaike, ka akinyet naka atala;

¹⁵ Etem loka lukisupurununo, ka adaketake; akinyet nakinyonyoanakina, ka lukisupurununo, ka aigalisit naka ekek, kokek loka ewema lokalaunan;

¹⁶ Etem loka ainakineta nuicweio, ka eboike loka aisinit, ka adaketake, ka iboroke kere; akalaya ka aigaŋeteke;

¹⁷ Igoen luigalitoi luka alaro, ipirinoke ka aigaŋetakec, ka aigalisit naka erute loka alaro;

¹⁸Iloin luka ewema lokalaunan, ka iloin luka alaro, ka aunoikec;

¹⁹ Inapen luedonyitai ejok, aijaanakinia aibois nakalaunan, inapen lukalaunak luka Aaron esasedoti, ka inapen luka odweke, aijaanakinia osasedotene.”

²⁰Konyou ekodet kere loka idwe luka Isirael kaneajai Musa.

²¹ Kopotu, ŋinituŋanan yenabu etauke kominakin, ŋinituŋanan yenabu ekemoyo kokotokin, koyaut ainakinet naka EJAKAIT, kanuka aiswamaunia ewema loka airiamunun, ka aijaanakinike kere, ka inapen lukalaunak.

²²Kopotu, ikiliok ka aŋor da, kere luakotosi ikecetauon, koyaut abwakai, ka itetio, ka igilun, ka aikomon, kere luka esabu; ŋolituŋanan loabu koinak ainakinet naka esabu mama ejai EJAKAIT.

²³ Ŋoltuŋanan da, loajai lobululu ka lomuge ka lokareŋan, ka ebaputa loejok, ka ajul nuka akinei, ka imukulen luka imerekekin luitereŋitai, ka imukulen luka itakasin abu koyau kes.

²⁴Ŋinituŋanan yenabu koinak ainakinet naka epuesa ka aisinit, abu koyau ainakinet naka EJAKAIT: ŋolituŋanan da loajaas akito nuka sita kanuka aswam naka aijaanakin, abu koyau.

²⁵ Aŋor da kere nuapiriaka kotauon apotu koojioto kakecekanin, koyaut da luapotu koojiut, lobululu, ka lomuge, ka lokareŋan, ka ebaputa loejok.

²⁶Aŋor kere nuaminakina kotauonokec kacoa apotu koojioto ajul nuka akinei.

²⁷ Koyaut ikayaitok amor nuemelomeloto, ka amor nuipiripiranara, aibwaikin opod, ka yenikatorub;

²⁸ Ka lueuru maa, ka akinyet; naka atala ka akinyet nakinyonyoanakina, ka luka lukisupurununo.

²⁹ Koyaut idwe luka Isirael ainakinet naka akot mama ejai EJAKAIT: ŋolikiliokit ka ŋiniberu luakotos ikecetauon ayaun kanuka aswam kere, naabu EJAKAIT kicorak, aiswamaunio kama kaMusa.

³⁰ Kotema Musa idwe luka Isirael atiar, “Koanyutu, anyarau EJAKAIT Besalel, okoku loka Uri, okoku loka Kur, loka ateker naka Yuda;

³¹ Eleleb ŋes kemoyo loka Edeke, kacoa, ka aijen ka apirianut, ka iponesio kere luka aswam;

³²Aswam aswamisro nuka apirianut, atata esabu ka epuesa ka aisinit.

³³Aigir amor nuiminaikinere, ka aiger akito, aswam da iponesio kere luka aswam nakapirianut.

³⁴ Ebwaiki otauke tetere isisianakini, ŋes ka Okoliab, okoku loka Akisamak loka ateker naka Dan.

³⁵ Eleleb ŋesi kes kacoa nakotau, aswam iponesio kere luka aswam, naka ekegiran ka ekeswaman loka apirianut, ka naka ekasonyan lobululu, ka lomuge, ka lokareŋan, ka ebaputa loejok, ka naka ekaojion, naka ŋul kere kaluiswamaete ŋiniswam kere, ka naka ŋul kaluiswamaete aswamisio nuka apirianut.