Read Ebaibuli 1961 Anyoun 36 Bible Online

Anyoun 36 - Ebaibuli 1961 bible

Anyoun 36

¹ “Iswamaete Besalel ka Okoliab, ka ŋinituŋanan yenepinana kotau, yeneinakinit EJAKAIT acoa ka apirianut aijen aiswamaun aswam kere naka aijaanakin naka aibois nakalaunan, kwape ajaatar kere nuecorakinit EJAKAIT.”

² Konyarau Musa Besalel ka Okoliab, ka ŋinituŋanan yenepiriana kotau, yeneinakinit EJAKAIT acoa otauke, ŋinituŋanan yenabu eketau kominakin abunore aswam:

³ Kijaasi Musa ainakineta kere, nuapotu idwe luka Isirael koyaut kanuka aswam naka aijaanakin naka aibois nakalaunan, aiswamaunia. Koyaununutu bobo mama ejai ŋesi ainakineta nuka akot ŋinitupuruc.

⁴Ituŋa da lukacoa lueswamaete aswam kere naka aibois nakalaunan, kobu ŋinituŋanan kaswamuke naeswamaete kesi;

⁵ Kotemasi Musa atiar, “Eyaunete ituŋa luedeparito noi kanuka aijaanakin naka aswam, naecorakinit EJAKAIT aiswamaun.”

⁶Kicorak Musa, kolimoroi da koidukurun kere ebe, “Sirikiyataki bobo ekiliokit arai aberu aswam kanuka ainakinet naka aibois nakalaunan.” Kwaŋin kitikokinai ituŋa ayaunun.

⁷Naarai adolito iboro luajaatar kesi aiswamaunia aswam kere, kodeparito da.

⁸ Ŋinituŋanan yenapiriana kotau ka ŋul kalueswamaete aswam kiswamau ewema lokalaunan kaigalisio atomon; nuka ebaputa loecipitai kiusio lueriim, ka lobululu, ka lomuge, ka lokareŋan, ka ikerubin, aswam naka ekeswaman kaloepiriana ŋes eswamaunia.

⁹Aojau naka ŋiniigalisit arai ikubitin [27] akaisaarei ka lukanykauni, ka alalauke ikubitin iwoŋon; aigalisio kere araas nuka aitemis adiopet.

¹⁰Abu koropik aigalisio akany: koropik da aigalisio ace akany.

¹¹Abu kiswamak akodeta nubululu oreret loka aigalisit nakawasia kotoma kanuaropikinitai: kiswama kwaŋin koreret loka aigalisit nakawasia kotoma kanuce kanuaropikinitai.

¹² Abu kiswamak akodeta akaisakany aigalisit adiopet kiswamak da akodeta akaisakany oreret loka aigalisit nakiareit naaropikinitai; kiteosi da akodeta ŋun.

¹³Abu kiswamau aruceta akaisakany nuka esabu, kimorikik aigalisio karuceta: koraun do ewema ediopet lokalaunan.

¹⁴ Abu kiswamau aigalisio nuka ajul nuka akinei kanuka ewema lokokuju ewema lokalaunan: kiswamau aigalisio atomon ka nadiopet.

¹⁵Aojau naka ŋiniigalisit ikubitin akaisauni, ka alalau naka ŋiniigalisit ikubitin iwoŋon: araas aigalisio atomon ka nadiopet nuka aitemis adiopet.

¹⁶Abu koropik aigalisio akany bonik, ka aigalisio nuce akanykape bonik.

¹⁷Abu kiswamak akodeta akaisakany oreret loka aigalisit nakawasia kaŋun kanuaropikinitai, kiswamak da akodeta akaisakany oreret loka aigalisit nakawasia ka nuce kanuaropikinitai.

¹⁸Abu kiswamau aruceta akaisakany nuka aisinit aimorikikinia ewema tetere eraun ediopet.

¹⁹ Abu kiswamau eimukoret loka ewema kimukulen luka imerekekin luitereŋitai, ka eimukoret loka imukulen luka itakasin kujuke.

²⁰ Abu kiswamau abaoi nuka ewema lokalaunan kakito nuka sita, nuesipos.

²¹Aojau naka abao arai ikubitin itomon, alalau naka ŋinibao arai ekubit ediopet ka atutubet.

²²Ŋinibao ajaas arucetake aarei nuarucokinito adiopet neajai nace: abu kiswamau kwaŋin abaoi kere nuka ewema lokalaunan.

²³Abu kiswamau abaoi nuka ewema lokalaunan; abaoi akaisaarei kowai loka eŋalakimak kari naka eŋalakimak:

²⁴Abu kiswamau aigaŋeta akaisaoŋon nuka epuesa kwap kabaoi akaisaarei; aigaŋeta aarei kwap kabao adiopet neelomarete arucetake aarei, ka aigaŋeta aarei kwap kacebao neelomarete arucetake aarei.

²⁵Kowai lokiareit loka ewema lokalaunan, kowai loka agolitomei, abu kiswamau abaoi akaisaarei.

²⁶Ka aigaŋetakec akaisaoŋon nuka epuesa; aigaŋeta aarei kwap kabao adiopet, ka aigaŋeta aarei kwap kacebao.

²⁷Abu kiswamau abaoi akanykape kowai lokokau kari nakoto.

²⁸Abu kiswamau abaoi aarei nuka agoria nuajaas to kewema lokalaunan.

²⁹ Koraas aareiarei kokwap, kirotakina kwaŋin kiton kuju ogilut ediopet: abu kiswamau kes kwaŋin kagoria kere aarei.

³⁰Ajaas abaoi akanykauni, ka aigaŋetakec nuka epuesa, aigaŋeta atomon ka nukanykape; kwap kaŋinibao aigaŋeta aarei.

³¹ Abu kiswamau ariino nuka akito nuka sita; akany nuka abaoi nukowai ediopet loka ewema.

³²Ka ariino ace akany nuka abaoi nukowai ece loka ewema, ka ariino akany nukoto kewema kari nakoto.

³³Abu kiriik ariit nakokidiŋ naejai kidiŋ kabaoi anyoun kepuai kiton epuai.

³⁴Kiladaa abaoi kesabu, kiswamak da igilunakec luka esabu lukitoloma ariino: kiladaa ariino kesabu.

³⁵ Abu kiswamau aigalisit kegoe, kalobululu, ka lomuge, ka lokareŋan, ka ebaputa loecipitai kiusio lueriim, icipakinio ikerubin ogoe aswam naka ekeswaman loepiriana, ŋes eswamaunia.

³⁶Abu kiswamak ipirin iwoŋon luka akito nuka sita, kiladaa kes kesabu: koraas igolunakec luka esabu: kotatak kes aigaŋeta nuka epuesa.

³⁷ Abu kiswamau aigalisit naka ekek loka Ewema, lobululu, ka lomuge, ka lokareŋan, ka ebaputa loecipitai kiusio lueriim, aswam naka ekasonyan.

³⁸ Ka ipirinoke ikany ka igolunakec: kiladaa akwesikec ka aikajetakec kesabu: koraas aigaŋetakec akany nuka aisinit.