Read Ebaibuli 1961 Anyoun 37 Bible Online

Anyoun 37 - Ebaibuli 1961 bible

Anyoun 37

¹ Kosodi Besalel aiswamaun asaduku kakito nuka sita: aojauke ikubitin iarei ka atutubet, alalauke ekubit [28] ka atutubet, amukururuke da ekubit ka atutubet.

²Kiladaa ŋes kesabu loelai kujuke kotomake da, kosubak ŋes atorosit naka esabu airimor.

³Kotatak ŋes igilun iwoŋon luka esabu akejeke aoŋon; igilun iarei osiepike ediopet, ka igilun iarei osiepike ece.

⁴ Abu kiswamau adaketa nuka akito nuka sita, kiladaa kes kesabu.

⁵ Kitolomik adaketa ogilun lukosiepion luka asaduku, adakia asaduku.

⁶ Abu kiswamau eicoloŋ-lokaitim loka esabu loelai, aojauke ikubitin iarei ka atutubet, alalauke ekubit ka atutubet.

⁷Abu kiswamau ikerubin iarei luka esabu: aswam naerukuk ŋes eswamaunia, kosaŋeta iarei luka eicoloŋ-lokaitim.

⁸Ekerubi ediopet osaŋe ediopet, ka ekerubi ece da osaŋe ece: kiswamau eicoloŋ-lokaitim ka ikerubinike koraas luka ibore idiopet.

⁹ Kigararaasi ikerubin abebenokakec kuju, korapito eicoloŋ-lokaitim kabebenokakec, kiteos ireetakec, kosesenete ireeta luka ikerubin oicoloŋ-lokaitim.

¹⁰ Abu kiswamau emesa loka akito nuka sita; aojauke ikubitin iarei, alalauke ekubit, amukururuke ekubit ka atutubet.

¹¹Kiladaa kesabu loelai, kosubak atorosit naka esabu airimor.

¹²Abu kiswamak atokitoit alalau naka akan airimor, kiswamak da atorosit naka esabu airimor atokitoit.

¹³Kotatak ŋes igilun iwoŋon luka esabu, kibwaik igilun agoria aoŋon nuajaas akejeke aoŋon.

¹⁴Edunyas igilun katokitoit, aiboisio nuka adaketa adakia emesa.

¹⁵Abu kiswamau adaketa nuka akito nuka sita, kiladaa kes kesabu, adakia emesa.

¹⁶ Abu kiswamau iboro luajaas omesa, atubaake, ka akaaleike, ka atanyake, ka amotiike, abukununio, nuka esabu loelai.

¹⁷ Abu kiswamau epir loka atala loka esabu loelai: kiswamau epir loka atala kaswam naerukuk, abwoeteke, ka akodeteke; akolinoke ka akwesike, ka aturoke, araas nuka ibore idiopet.

¹⁸Alomunito icogen ikanykape kowaitinike; icogen iuni kowai ediopet loka epir loka atala, ka icogen da iuni kowai loce loka epir loka atala:

¹⁹Akolin auni nueswamatai aputorit aturo kocoget ediopet, akouke ka aturot: akolin auni nueswamatai aputorit aturo kocoget ece, akouke ka aturot: kwaŋin kotoma ocogen ikanykape lualomunito kopir loka atala.

²⁰ Ajaas akolin aoŋon kotoma opir loka atala nueswamatai aputorit aturo, akwesikec ka aturokec.

²¹Akou kwap kicogen iarei luka ibore idiopet, ka akou kwap kicogen iarei luka ibore idiopet, ka akou kwap kicogen iarei luka ibore idiopet, kwape ajaatar icogen ikanykape lualomunito kopir.

²²Akwesikec ka icogenekec araas luka ibore idiopet: korai kere aswam naerukuk naka esabu loelai.

²³ Abu kiswamau atalaike, akanykaarei, ka aitudeŋetake ka asaninike nuka ekurwon, nuka esabu loelai.

²⁴Abu kiswamau ŋes katalata [29] naka esabu loelai, ka iboroke kere.

²⁵ Abu kiswamau etem lokisupuruunet lukisupurununo loka akito nuka sita: aojauke ekubit, alalauke da ekubit, loka agoria aoŋon nueriakanara; amukururuke ikubitin iarei; amumwarake araas nuka ibore idiopet kaŋes.

²⁶Kiladaa ŋes kesabu loelai, kujuke ka isiepionoke ka amumwarake: kiswamak da ŋes atorosit naka esabu airimor.

²⁷Abu kiswamak ŋes igilun iarei luka esabu kwap katorositike, amaranake aarei, kosiepionoke iarei, koraas aiboisio nuka adaketa adakia ŋes.

²⁸Abu kiswamau adaketa nuka akito nuka sita, kiladaa kes kesabu.

²⁹ Abu kinyal akinyet nakalaunan nakinyonyoanakina, ka lukisupurununo luka lueuru maa, kwape ajaar apirianut naka ekenyalan lueuru maa.