Read Ebaibuli 1961 Anyoun 39 Bible Online

Anyoun 39 - Ebaibuli 1961 bible

Anyoun 39

¹ Apotu kiswamaut inapen luecipitai ejok luka lobululu, ka lomuge, ka lokareŋan, aijaanakinia kaibois nakalaunan, kiswamaut inapen lukalaunak kanuka Aaron; kwape ecorakinitor EJAKAIT Musa.

² Abu kiswamau epod[32] loka esabu, ka lobululu, ka lomuge, ka lokareŋan, ka ebaputa loecipitai kiusio lueriim.

³Kibenibenata esabu, kididiununutu adonyokinio lobululu, ka lomuge, ka Lokareŋan, ka ebaputa loejok, aswam naka ekeswaman loepiriana.

⁴Apotu kiswamakis lukokeperin, luimorikikinitai; kimorikikinitete kosaŋetake iarei.

⁵ Aenet naecipitai kapirianut, naajai tomake aenia, arai naka aput adiopet, koputos kaswamuke; naka esabu, ka lobululu, ka lomuge, ka lokareŋan, ka ebaputa Loecipitai kiusio lueriim; kwape ecorakinitor EJAKAIT Musa.

⁶ Kigirut amor nuemelomeloto, kolukut kes kapesan nuka esabu, kigirunai kaigiruneta nuka emacar, kwape ajaatar ikiroria luka idwe luka Isirael.

⁷ Kibwaik kes okeperin luka epod, araut amor nuka aisiitunet kanuka idwe luka Isirael; kwape ecorakinitor EJAKAIT Musa.

⁸ Abu kiswamau yenikatorob, aswam naka ekeswaman loepiriana, koputos kaswam naka epod, yenika esabu ka lobululu, ka lomuge, ka lokareŋan, ka ebaputa loecipitai kiusio lueriim.

⁹Korai yenika agoria aoŋon nueriakanara; kokudokis yenikatorob bala eriagi: aojauke atutubet naka ekubit, alalauke da atutubet naka ekubit.

¹⁰ Kipiripiranakis ikokoron iwoŋon luka amor: ekokoro losodit arai loka asadio, ka atopasit,[33] ka karubunikol;

¹¹ Ekokoro lokiareit loka emeralid, ka asapiro, ka daimod;

¹²Ekokoro lokiwuniet loka eyasit, ka aget, ka ametusit;

¹³ Ekokoro lokiwoŋonet loka aberul, ka naemelomelot,[34] ka ayaseper: aponi kolukunai kapesan nuka esabu loiminaikinere.

¹⁴Araas amor kwape ajaatar ikiroria luka idwe luka Isirael, atomon ka nuarei, kwape ajaatar ikiroriakec; kwape igiria emacar, ŋinituŋanan kwape ajaar ekekiror, kanuka atekerin atomon ka nuarei.

¹⁵Apotu kiswamakis yenikatorob irikoi luesubito bala aunoi luka aswam naeojitoi naka esabu loelai.

¹⁶Apotu kiswamaut apesan aarei nuka esabu, ka igilun iarei luka esabu; kibwaikis igilun ŋul iarei osaŋeta iarei luka yenikatorob.

¹⁷Kibwaikis da irikoi ŋul iarei lueojitoi luka esabu ogilun iarei kosaŋeta luka yenikatorob.

¹⁸Kibwaikis isaŋeta luce iarei luka irikoi apesan aarei, kibwaikis kes okeperin luka epod, kowai lokoiŋaren.

¹⁹Apotu kiswamaut igilun iarei luka esabu, kibwaikis osaŋeta iarei luka yenikatorob, toma atokitoitike naajai owai lokotoma loka epod.

²⁰Kiswamaut igilun iarei luka esabu, kibwaikis kes okeperin iarei luka epod kwapuke, kowai lokoiŋaren, eiduny kaimorikikinetake, kuju aenet naka epod naecipitai kapirianut.

²¹Koenikis igilun luka yenikatorob ka igilun luka epod keusi lobululu, tetere iboie kokuju aenet naka epod naecipitai kapirianur, tetere mam yenikatorob ilajakin kepod; kwape ecorakinitor EJAKAIT Musa.

²² Abu kiswamau ekaso loka epod, korai kere lobululu.

²³Ka apedot naka ekaso kotomake, kwape kapedot naka ekooti loka acuma, kojai atokitoit airimor apedotoke tetere mam ecila.

²⁴Kiswamakis atwelei nuka ekaso akamamagan nuka lobululu, ka lomuge ka lokareŋan, ka ebaputa loecipitai kiusio lueriim.

²⁵ Kiswamaut icirin luka esabu kaloelai, kibwaikis icirin kidiŋ kakamamagan airimor atwelei nuka ekaso, kidiŋ kakamamagan;

²⁶Ecirit ka akamamaga, ecirit ka akamamaga, airimor atwelei nuka eka so, aijaanakinia; kwape ecorakinitor EJAKAIT Musa.

²⁷ Apotu kiswamaut ikootin luka ebaputa loejok, luka aswam naecipitai kanuka Aaron ka odweke.

²⁸ Ka egoe lokieniena akou loka ebaputa loejok, ka igoen luejok luka akwes luka ebaputa loejok, ka ipalei luka ebaputa loecipitai kiusio Iucriim.

²⁹Ka aenet naka aŋabet naka ebaputa loecipitai kiusio lueriim, ka lobululu ka lomuge, ka lokareŋan, aswam naka ekasonyan; kwape ecorakinitor EJAKAIT Musa.

³⁰ Apotu kiswamaut amekemeket naka aboko naka esabu kaloelai, kiwadikakisi akirot, kwape igiria emacar ebe, IKALAUNAN YENIKA EJAKAIT.

³¹Koenikis eusi lobululu tomake, aenikinia ŋes kuju ogoe lokieniena akou; kwape ecorakinitor EJAKAIT Musa.

³² Kwaŋin kodaun aswam kere naka ewema lokalaunan loka ewema loka airiamunun: kiswamata idwe luka Isirael kwape ajaatar kere nuecorakinit EJAKAIT Musa, kiswamata kwaŋin.

³³ Koyaut ewema lokalaunan mama ejai Musa, Ewema, ka iboroke kere, arucetake, ka abaoike, ka ariinoke, ka ipirinoke, ka aigaŋetake;

³⁴Ka eimukoret loka imukulen luka itakasin, ka egoe loka aigalisit;

³⁵Asaduku naka aitejenunet, ka adaketake, ka eicoloŋ-lokaitim;

³⁶Emesa, ka iboroke kere, ka imugatin luka aitodikin;

³⁷ Epir loka atala loelai, ka atalaike, kes atalai nuesipokinio ejok, ka iboroke kere, ka akinyet naka atala;

³⁸Ka etem loka esabu, ka akinyet nakinyonyoanakina ka lukisupurununo, ka aigalisit naka ekek loka Ewema;

³⁹ Etem loka aisinit, ka eboike loka aisinit, ka adaketake, ka iboroke kere, akalaya ka aigaŋeteke;

⁴⁰ Igoen luigalitoi luka alaro, ka ipirinoke, ka aigaŋetake, ka aigalisit naka erute loka alaro, ka aunoike, ka iloinoke, ka iboro kere luka aijaanakin naka ewema lokalaunan, luka ewema loka airiamunun:

⁴¹Inapen luecipitai ejok luka aijaanakin kaibois nakalaunan, ka inapen lukalaunak kanuka Aaron esasedoti, ka inapen luka odweke, aijaanakinia kosasedotene.

⁴² Kwape ajaatar kere nuecorakinit EJAKAIT Musa, kiswamata idwe luka Isirael aswam kere.

⁴³ Koany Musa aswam kere, ido koany, apotu kodaut aswam; kwape ecorakinitor EJAKAIT, kwape kwaŋin eswamatotor: kilipak Musa kes arereŋ.