Read Ebaibuli 1961 Anyoun 4 Bible Online

Anyoun 4 - Ebaibuli 1961 bible

Anyoun 4

¹Koboŋok Musa atiar, “Konye, koany, mam keyuunete eoŋ karaida akiirar ekaporoto: naarai etemarete atiar, ‘Mam EJAKAIT kitaanyikina jo.’ ”

²Kotema EJAKAIT atiar, “Inyo bo ŋin ejai akanikon?” Kotema atiar, “Ebela.”

³Kotema atiar, “Kocakak kwap.” Kocakak kwap, koluor ebela emun; koker Musa kamake.

⁴Kotema EJAKAIT Musa atiar, “Korio akonikan, kitiŋ ekekori”: (korio akekan, kitiŋ, koraun emun ebela kakanike:)

⁵ “Tetere iyuunete ebe, abu EJAKAIT, Edeke loka lukapapaakec, Edeke loka Aburaam, Edeke loka Isaak, Edeke loka Yakob, kitaanyikin jo.”

⁶ Kotema EJAKAIT bobo atiar, “Kipiik akonikan atorobukon.” Kipiik akekan atorobuke: konye elemari, koany, ebokoror akekan atapon.

⁷ Kobala ebe, “Kinyakak akonikan atorobukon.” (Kinyakak akekan atorobuke; konye elemari katorobuke, koputokinos kakuanake kere.)

⁸“Kosodi kanen, arai mam kes kiyuunete jo karaida akiirar eporoto loka aanyunet nasodit, iyuunete kesi eporoto loka aanyunet nakiareit.

⁹ Kosodi arai mam iyuunete aanyuneta ŋun nuarei, karaida akiirar eporotokon, iwokuni akipi nukocor kobukok neeonit: akipi nuiwokuni kocor eluoros aokot kaneeoŋit.”

¹⁰ Kotema Musa EJAKAIT atiar, “Wu EJAKAIT, mere eoŋ ojijimikiro, karaida mam enerana, elaŋir da aŋajepeka.”

¹¹ Kotema EJAKAIT atiar, “Iŋai kesubi aituk naka ituŋanan? arai iŋai itababaŋi ituŋanan, arai aisikimiŋ, arai aitwekenyun arai aitumudak? mere Eoŋ EJAKAIT?

¹² Aso do kolot, ajaenena eoŋ kakoniituk, kesisianakini nuinera.”

¹³ Kotema atiar, “Wu EJAKAIT, keŋaiŋait, kijuka ŋol loikoto aijukar.”

¹⁴Kinep anyunyura naka Edeke aluikin Musa, kiner atiar, “Emamei Aaron onacekon Elebit? Ajeni ebe epedori ener ejok. Ido koany, ebunit airiamun kajo; kiiany jo iyalamikin kotauke.

¹⁵ Ineri ijo kaŋes, ipiikini da akiro aitukuke: eoŋ da ajaenena kakoniituk, ka akeituk, kesisianakinete nuiswamaete.

¹⁶ Eraun ŋesi ekeneranikon kama ejaas ituŋa; kosodi eraun ŋesi akoniituk, iraun ijo da kamake kwape Edeke.

¹⁷Itiŋi ijo ebela lo kakanikon, aiswamaa aanyuneta.”

¹⁸Kolot Musa koboŋo mama ejai Yetero ekamuranike, kotema atiar, “Keŋaiŋait, kisiikinai kalot, kaboŋo mama ejaas ikainacan luejaas Misiri, kaany arai eriŋa ejarete.” Kotema Yetero Musa atiar, “Kolot kainapakin.”

¹⁹ Kotema EJAKAIT Musa koMidian atiar, “Kolot, koboŋo Misiri: naarai atwaka ituŋa kere luakotosi aiar jo.”

²⁰ Koya Musa akeberu ka odweke, kisibwanen kes asigiria, koboŋo akwap nako Misiri: koya Musa ebela loka Edeke kakanike.

²¹ Kotema EJAKAIT Musa atiar, “Naiboŋoria Misiri, ibusakinit kiswama kakonyen nuka Parao nukaumokin kere nuepiik akanikon; konye etogogoŋi eketau, mam isiikini ituŋa alosit.

²² Ilimokini Parao atiar, ‘Inera EJAKAIT kwanata ebe, Isirael ŋes okokuka, ekiyaika.

²³ Katema eoŋ jo atiar, “Kisiik okokuka alosit kejaanak eoŋ.” Igir ijo aisiikin ŋes alosit; koany, aari okokukon, ekiyaikon.’ ”

²⁴ Kosodi eroko ejaas orot neaperete, kiriamunos EJAKAIT kaŋes kokoto aiar.

²⁵ Kosodi Sipora alemun amoru naekwana kotubunio amuny naka ekiliokane loka okokuke, kocakak akejen nuka Musa; kotema atiar, “Abeit irai ijo eteran loka aokot kamakaŋ.”

²⁶Kinyek do ŋes. Kosodi ŋin atemar ebe, “Irai eteran loka aokot,” kanuka akepio.

²⁷ Kotema Edeke Aaron atiar, “Kolot modiŋ kiriamunos ka Musa.” Kolot, kiriamunos kaŋes moru loka Edeke, konu.

²⁸Kolimok Musa Aaron akiro kere nuka EJAKAIT nuejukaritor, ka aanyuneta kere nuecorakinit.

²⁹ Koloto Musa ka Aaron kotukonokisi imakio kere luka idwe luka Isirael;

³⁰Kiner Aaron akiro kere nualimokinit Edeke Musa, kiswama aanyuneta kakonyen nuka ituŋa.

³¹ Kiyuut ituŋa: kiirasi ebe aanyana EJAKAIT idwe luka Isirael, aanyu da aiticaniokec, kituluro akwesikec, komaata.