Read Ebaibuli 1961 Yob 1 Bible Online

Yob 1 - Ebaibuli 1961 bible

Yob 1

¹ Kojai etuŋanan kakwap naka Us, ekekiror Yob; kerai etuŋanan ŋol lomam itoronitai, loeteni, loayoŋit Edeke, kosacite da aronis.

²Kourite idwe lusap ikanykaarei, ka lupesur iuni.

³Ido iboroke araas amerekekin alukumin akanykaarei, ka akaalai alukumin auni, ka ajookon akwat akany nuka imoŋin iareiarei, ka asigirian nuŋor akwat akany, ka ikejaanakinak luipu noi; kanuka ŋun kerai etuŋanan loapol aitelekar idwe kere lukokide.

⁴Koloto odweke kipooto epucit ŋolidiopet kotogoke kapaaranike; kijukanarete anyaraunun ainacanakec auni ainyam ka aimat nepepe kakes.

⁵ Kosodi ketuboros apaarasia nuka epucitikec, kijuka Yob kitalau kes, kodilonokin anyounun tupuruc, koinanak ainakineta nuicweio kwape ketiaikec kere: naarai kobala Yob ebe, “Musiki adiakasi odweka, aiŋer Edeke toma otauonokec.” Kwape kwaŋin abu Yob kirucuruc aiswamaenen.

⁶ Kosodi kapaaran adiopet kopotu odwe luka Edeke aitodiar kakonyen nuka EJAKAIT, kobu Satan da nepepe kakes.

⁷ Kobala EJAKAIT ebe, “Satan, kibuni kai?” Koboŋok Satan kobala ebe, “Abuni kaboŋoboŋo keilat kakwap kariariat lailo ka laije.”

⁸Kobala EJAKAIT Satan ebe, “Iwomit ijo nuka ekakejaanakinan Yob? Naarai emamei loeputos kaŋes kakwap, etuŋanan lomam itoronitai, loeteni, loeyoŋit Edeke, esacit da aronis.”

⁹ Kosodi Satan aboŋokin ebe, “Eyoŋit kereka Yob Edeke atai?

¹⁰ Mam ibwaikinit abwas aisirimor ŋes, ka etogoke, ka iboro kere luejaatar, kowaitin kere? Isirerenit aswam naka akaninike, iyatakina ikeboro kakwap.

¹¹Konye korio cani akanikon, kotiro kere luejaatar, ido kiŋerokini ŋesi jo kakonyenekon.”

¹²Kobala EJAKAIT Satan atiar, “Koany, kere luejaatar ejaas toma akanikon, konye mam iriori akanikon mama ejai ŋesi elopet.” Konyou do Satan kama ejai EJAKAIT.

¹³ Kapaaran adiopet kenyamete ikedwe lusap ka lupesur, komasete da ebino kotogo loka onacekec lokapolon,

¹⁴kobu ekiyakia neejai Yob, kotema atiar, “Ajaas imoŋin ekoriete, kodakasi asigirian osiepikec:

¹⁵ aŋatasi Isabean ayaŋaasi kes; eebo, aarata ikatumunak kakwanis naka ekileŋ; eoŋ bon aku alimokin jo.”

¹⁶Eroko inera ŋesi, kobu ece kotema atiar, “Ebirun akim naka Edeke edokuni kokuju, anyama amerekekin, ka ikatumunak, amudia kes; eoŋ bon aku alimokin jo.”

¹⁷Eroko inera ŋesi, kobu ece kotema atiar, “Etemokis Ikaludean irioŋeta iuni, aŋatasi akaalai, ayaŋaasi kes, eebo, aarata ikatumunak kakwanis naka ekileŋ; eoŋ bon aku alimokin ijo.”

¹⁸Eroko inera ŋesi, kobu ece da kotema atiar, “Anyamete ikonidwe lusap ka lupesur amasete da ebino kotogo loka onacekec lokapolon:

¹⁹ido koany, kobu ekwam loepol kamodiŋ, kinom agoria aoŋon nuka etogo, korapak ikatumunak, atwaka da; eoŋ bon aku alimokin jo.”

²⁰ Kosodi Yob anyoun kocil elouke, kobaren akekou, kibirokin kwap, koma;

²¹ Kobala ebe, “Abu kalom kakoik naka totoka emujalal, aboŋori da emujalal: EJAKAIT ŋes abu kainak, ido EJAKAIT ŋes alemaa; kituritete ekiror loka EJAKAIT,”

²²Kotoma kaŋun kere mam abu Yob kodiaka mam da abu komoro Edeke abaŋaanut.