Read Ebaibuli 1961 Yob 10 Bible Online

Yob 10 - Ebaibuli 1961 bible

Yob 10

¹“Apianik ekatau akaijar; Erurumai koleleete akakiro; eneri kadwaris naka ekatau.

²Kabala eoŋ Edeke ebe, Sirikititeleka eoŋ akiro; kitodikinai nukiinakinit ijo apega keoŋ.

³Isiyalamikinit kereka ijo areit, tetere imwaŋi aswam naka akaninikon, Acaikin da ainerun naka ikaronok?

⁴ Ijaas kereka ijo akonye nuka akuan, arai bo ianyuni ijo da kwape eanyuniata ituŋa?

⁵Eputosi tope apaarasiakon kapaarasia nuka ituŋa, arai bo ikarukon kwape apaarasia nuka ituŋa?

⁶Tape iŋici numam adoliteka, imoi da akaronis.

⁷Karaida kijeni ebe mam eoŋ arono; emamei da loepedori ayuun kakanikon.

⁸ Akaninikon kes keluŋuluŋuŋete kasubunete da nepepe airimor; konye kimudia eoŋ.

⁹ Keŋaiŋait; kiitu kwape kisubunia kelupe; ido ikoto ainyakar bobo toma apua?

¹⁰ Mam kereka jo kibukunit eoŋ kwape kakile” kisicarakamit eoŋ kwape edika?

¹¹Kitanapit eoŋ amuny ka akiriŋ, ibu kisimorikik eoŋ kakojo ka aputio.

¹²Ibu koinak eoŋ aijar ka asianut, aibuakinitekon ŋes iricitor ekamoyo.

¹³Konye ibu kimunono akiro nu otaukon; ajeni ebe ajaas ŋun kajo;

¹⁴arai kadiaka, irerei ijo, mam kilacari eoŋ kanumam adoliteka.

¹⁵ Arai arono eoŋ, itukwi eoŋ; arai adolit, mam teni ekeuni akakou; Emuara eoŋ noi, etei akaiticanio.

¹⁶ Arai ketopoloo akakou, kiriga kwape keŋatuny; kosodi bobo itoduna iumokina kaneajai.

¹⁷Kiteteu ikonikajenak kaneajai, iyatakini akadakinitekon kaneajai; kiiny eoŋ ajoresio ka ejie.

¹⁸“Aso ca kanukinyo kitolomunia eoŋ kakoik? Tikajal aijar, komam akoŋu aanyun eoŋ.

¹⁹Tikajau bala mam abu kajai; tikadakun anyoun kotoma akoik aitarasario toma ailit.

²⁰ Mam apaarasiaka ikidioko? Aso kopala do, kinyeinai, kalakari mot,

²¹ eroko keloto ŋina nemam aboŋunio bobo, ŋes akwap naka amuton ka etoribe loka atwanare;

²²akwap naka amuton naejesi ŋaŋ, naemutono cucucuc; akwap naka etoribe loka atwanare, naijulujula, naesubit aicake bala amuton.”