Read Ebaibuli 1961 Yob 15 Bible Online

Yob 15 - Ebaibuli 1961 bible

Yob 15

¹Kosodi koboŋok Elipas Etemanit kotema atiar,:

²“Ti kereka keboŋoki lokacoa kaijen naatai, kisileleb akoikike kekwam lokokide?

³Tikepegata kakiro nuemameete ajokis, arai bo aibakibak numam epedoros?

⁴Eebo, itapalauni aiyoŋ, ido itikokini aima Edeke.

⁵Naarai numam adolitekon kes isisianakinete aitukukon, iseuni ijo aŋajep naka araparap.

⁶Akoniituk ŋes kitubok aitelekar jo, konye mere eoŋ; eebo, akoniituk ŋes akajenanikon.

⁷ “Ijo tope ibu kogeik ituŋa kere auruunio? Arai bo kourii jo eroko imor?

⁸ Ipupunit kereka kolo ijo ainerun nakaiyeiyea naka Edeke? Iwomikina ijo bon araun lokacoa?

⁹ Anu bo nuijeni ijo numam sio kijeni? Anu bo da nuimisiikinit ijo komam sio?

¹⁰ Ejaas kamakosi da luabwaŋutu akoruo ka luemojoŋito noi, luitelekarito papakon kamojoŋ.

¹¹Aitalakar naka Edeke mam kidaunit jo, ka akirot naiswamai kajo kaiyapepera?

¹²Kanukinyo kiyaŋaaria ekonitau? Kanukinyo da ereŋatatar akonikonye?

¹³Tape ibelokini ekonitau aluikin Edeke, acamakin akiro nuikote nen alomun kaitukukon.

¹⁴ Inyo bo ituŋanan tape elaunit? Ka yeneuriei aberu tape edolit?

¹⁵ Koany, mam Edeke emuno lukalaunakake; eebo, mam akuj elai kakonyeneke.

¹⁶ Ikwaikini bo do ai ŋin yenimodok yenebos, ituŋanan yenemasi numam adolit kwape kakipi!

¹⁷“Ketodikini jo, kopup eoŋ: Kaŋun nuabu kaany alimokini:

¹⁸ (nuapotu lukacoa kolimosi ameun kalukapapaakec, komam aimunon.

¹⁹ Aponi koinakinai kes akwap, kwabo komamei imoit yenikitori kamakec).

²⁰ Ikilianar ikaronon kariebo apaarasiake kere, kes etiai loka ikar kaluisiŋadikinitai ikareiton.

²¹ Edolokinete iporotoi luketasuro akike: kekerianar ebunokini ekaŋatan ŋes.

²²Mam iyuuni ebe eboŋuni kotoma amuton, ido idareunit ekileŋ ŋes.

²³ Irii lunyaman, kobala ebe, ‘Ai bo ejaas?’ Ejeni ŋesi ebe ekapakina apaaran naka amuton aapu kaŋes.

²⁴Aburun ka ariebo itukurianete ŋes; ipikorete, kwape ekabaka loitemonokino ejie.

²⁵ Naarai ario akekan neejai Edeke, edorit Lokapedor kere.

²⁶Emotakini kitininikite emurisiŋ, kojaas imugogol luepolok oupaliake.

²⁷ Naarai arapaki atumes akonyeneke, ijaŋililos aŋaliŋalin kosiepionoke;

²⁸iboienenei koreria luiswapito, kotogoi luemamei ituŋanan kotoma, luelosete araun aapoŋor.

²⁹Mam ebarenenei, karaida ikeboro aibut kaneejai, karaida akeceraito mam ilururuete.

³⁰ Mam enyoununei kamuton; itooni akim aketenuna, ido eoliori cut kanuka eiyeŋane loka aitukuke.

³¹ Kinyek amunokin aamameak, amodomoda bon; naarai aamameak kes eraunos ekeropit.

³² Etacakinio eriŋa apakike kedolo, mam aketenut eraun naetiitii.

³³Eraraari araitoke numam ekokito kwape emusabibu, ido itodoori aturoke kwape keseituni.

³⁴ Naarai atukot naka ŋul kalumam eyoŋito Edeke eraunun arakan, enyamenenei akim iweman luka ainakineta nuitumudakete akonye.

³⁵ Epotuunete aronis, kosodete aur numam adolit, itemonokinete itauonokec aiŋal.”