Read Ebaibuli 1961 Yob 20 Bible Online

Yob 20 - Ebaibuli 1961 bible

Yob 20

¹Kosodi koboŋok Sopar Enaamatit kotema atiar,

²“Ŋes kaboŋokinioto akaomisio, kanuka aisunyit naejai kotomaka.

³Apupu aitoronio nakesurumit ileic, ido kaboŋok eoŋ emoyo loka ajenunika.

⁴Mam ibu kojen nu sek ageun naebwaikinere ituŋanan akwap,

⁵ ebe, euriana apak naipikoriata ikaronok, ailel da naka lumam eyoŋito Edeke erai naka apak adio?

⁶Karaida kimukurur akepolou kiton akuj, akekou da adolokin odouon;

⁷Konye eoliori ikar kere kwape kakecin; ebalasi ŋul luaanyunito ŋes ebe, ‘Ejai bo ai?’

⁸Elicari ŋesi kwape airujasit, komam etakani: eebo, ireŋeanario cut kwape aitapoet naka akuar.

⁹Akoŋu nakeanyunit ŋes mam eanyuni bobo; mam babo etakanuni aiboisike.

¹⁰Emoete ikedwe asianut naka lukican, inyakanakinete akekanin abarake.

¹¹Ileleba akekojo akuruŋanake, konye eperenenei kaŋes kotoma apua.

¹²“Karaida kejijim aronis kaitukuke, karaida kibwa kwap kaŋajepeke,

¹³karaida iŋadakini, komam ekoto aijal, konye itasalikini aitukuke;

¹⁴ kwabo iumakinete inyamatake kakoikike, eraunos aisorit naka asigirikoloŋa kotomake.

¹⁵ Abu kiliko abar, ido elekuni babo: ebukuni Edeke kotoma akoikike.

¹⁶Imujumuji aisorit naka asigirikoloŋa; eari aŋajep naka emusaga ŋes.

¹⁷ Mam ŋes eseseni icorin, icileta lueleleete kesik ka akinyet.

¹⁸Inyakakini nuka akeitaaritoi, komam ilikonori; mam iyalamikini kanuka ameda naka aimutunuke.

¹⁹Naarai abu koreite ka aijal lukican; abu koŋatu etogo kagogoŋ, lomam adukit.

²⁰ “Naarai mam abu kojenu aiyamakina kotomake, mam itukui imodiobore kaŋul kalukisiyalamikinete ŋes.

²¹Mam abu kitasal imodiobore, konyama pit; kanuka ŋun mam akerianutuke ebusi.

²²Karaida kebarara iboroke konye erai yeneridakina; ebunokini ŋes agogoŋ kere naka lueburunito.

²³ Napedwara ageun aigigin, ebukonokini Edeke ŋes adedeŋ naka akenyunyura, isitepanakini kwape lunyamanake.

²⁴ Ekerenenei ŋesi yenijiis yenika asuat, ipelonori emal loka aisinit ŋes.

²⁵ Eutuni alemun kakuanake; eebo, elomuni amilisisike naemwekimweki kopiuke; ejaas nuketasuro kamake.

²⁶ Aponi kiŋadakinai amuton kere abarake; icweikini ŋes akim namam isinepito ituŋa; idopori ŋul luesalakinete owemake.

²⁷ Epukori akuj numam adoliteke, enyoikini da akwap ŋes.

²⁸Enyouni ameda nakotogoke, elelearete ikeboro kapaaran naka anyunyurake.

²⁹ Ŋin ŋes akorakinet naka ituŋanan yenikaronon kama ejai Edeke, airumet da naeseikinit Edeke ŋes.”