Read Ebaibuli 1961 Yob 24 Bible Online

Yob 24 - Ebaibuli 1961 bible

Yob 24

¹ “Kanukinyo mam Lokapedor kere iŋadakinia apakio? Kanukinyo da mam ŋul luejenete ŋes eanyuniata akepaarasia?

² Ejaas luilocete iikorun luka alupokec; enaŋete isipanin kadedeŋ, kosodete aitadak.

³ Emearete asigiria naka ikoki, eyaŋaarete emoŋ loka apuserut araun aititiŋet.

⁴ Isinacete luilwaritos erot; eŋopete lukican luka akwap nepepe.

⁵Koany, kwape atukoi kamodiŋ, elomarete aswamukec, edunyakinito amoot luenyamete; einakini ais kes inyamat luka idwekec.

⁶Etubete inya lukokitui; irarete da imono luka emusabibu loka lokaronon.

⁷ Eperete akuare kia kimujalalas, komameete inapen, karaida lukimukos kanuka aaterot.

⁸ Ebaunete kanuka elimilim loka iroŋan, etunete atiiba kemamiki neemecete.

⁹Ejaas luiwuruporete ikoki kokisin, ka alemar aititiŋet naka lukican.

¹⁰Kolosete imujalalas emameete inapen, koriebi kes eteŋei ibwokito isutan.

¹¹Icuete akinyet kotoma arwatatin nuka ituŋa kaŋul, icakacakaete acuetakec nuka ebino, kojakite akur.

¹² Irianaros ituŋa ejaas ore loipu ituŋa, emonyete itauon luka luimusuŋitai, konye mam Edeke epodo ailipikec.

¹³“Ejaas ŋul toma otiai loka ŋul kaluepaliikis aica, mam ejenete ikerotin, komam etuparete ikesokono.

¹⁴Enyouni ekaaran ecila kide, eari lukican ka luilwaritos, kewar akwap esubi bala ekokolan.

¹⁵Idarit akoŋu naka lodote amuton, kobala ebe, ‘Emamei yenikaanyuni.’ Itegelikini akekonyen.

¹⁶ Kotoma amuton ŋes ebokiata itogoi, egoloros paaran; mam ejenete aica.

¹⁷Naarai atupuruc esubit kamakec kere kwape etoribe loka atwanare, naarai enaikinito nuketasuro nuka etoribe loka atwanare.

¹⁸“Ibalasi yesi ebe, ‘Ijelelearos katipet kokuju akipi, ikenitoi akorakinetekec kakwap: mam epaari orot loebei omanikoria luka emusabibu.

¹⁹Akamu ka amwanis itoonikinete akipi nuepote koroŋan, atwanare da ŋul lukadiakanarak.

²⁰ Imurwokini ŋes aliliget; enyamete ŋes ikur kojijimikis; mam iitunio bobo: ebilio do amamus adolit kwape kekitoi.’

²¹“Enyami ŋesi arakan namam euriei: mam iswamakini apuserut ejok.

²²Konye Edeke kapedorike itubusi ikadedeŋak, enyounete, namam emunototor ajaut kaijar.

²³Einakini kes araut luinapakina, egoŋakinos nen; esesenete akonyeke da irotinikec.

²⁴ Itopoloorio kes; konye ketubor apak naedit, eoliorete; eebo, itidisiario, elemario korot kwape ice kere, esakario da kwape aluŋuren nuka akima.

²⁵Arai mam ikote nen kwana, iŋai bo kelepilepi kwape eŋalaa, aitodikin da ebe nuenera eoŋ eraas aamameak?”