Read Ebaibuli 1961 Yob 27 Bible Online

Yob 27 - Ebaibuli 1961 bible

Yob 27

¹Kosodi kiyatak Yob akewarag, kotema atiar:

² “Kwape ejaria Edeke, loabu kadema eoŋ akapolou, ka Lokapedor kere, loabu kipiiki adwaris toma otauka;

³(naarai akaijar eroko itekoro kamakaŋ, ka eiyeŋane da loka Edeke ejai toma okumesika;)

⁴Abeit mam akaituk inera numam edolito, karaida akaŋajep alimonor nukaiŋal.

⁵ Madi akui eoŋ aitojok yes, mam alemari akabeit kamakaŋ aitodol neatwania.

⁶ Etogogoŋi akadolit, komam aosikini, mam ekatau ketoroni akapaarasia kere.

⁷“Koraun lokasurupika kwape ekaronon, ka ŋol da lokanyoikini koraun kwape lomam edolit.

⁸ Naarai amuno naka ŋol kalomam ejeni Edeke ŋes inye, arai kemudia Edeke ŋes, ido bo kelema Edeke akeijar?

⁹ Epupununei kereka Edeke akeimony, arai kedolonokis ŋes ican?

¹⁰ Epedori kereka ŋesi aisiyalamikin mama ejai Lokapedor kere, kosodi amonyenen mama ejai Edeke apaarasia kere?

¹¹Kesisianakini yes nuka akan naka Edeke, mam emunonikini nuejaas ka Lokapedor kere.

¹²Koany, ipotu yesi kere koanyutu kanukus, aso inyo bo kituluori cut iamameak?

¹³“Lo ŋes ewai loka lokaronon kama ejai Edeke, airumet naka ikamenitok, naeinakinio kes kama ejai Lokapedor kere.

¹⁴ Arai kiyatanakinos ikedwe, iyatanakinos okileŋ: mam akelwak imonianakinos inyamat.

¹⁵ Luesalakinete kaŋes idaenenoo atular, mam akepuserun ekuudianete ŋes.

¹⁶Karaida ketukokinit epuesa kwape apua, kitemonokinite inapen kwape elupe;

¹⁷ epedori aitemokin, konye loedolit ŋes enapi, ido loemamei akirot ŋes ekori epuesa.

¹⁸ Eduki eketogo kwape asimokok, kwape eswam loiswamai ekedaran.

¹⁹ Eperi korai ekabaran, konye mam etukokinio; ekwenyuni, ido komamei.

²⁰Edolokinete ŋes nuketasuro kwape kakipi; esiia ŋes etapipirio kuare.

²¹Eyaŋaari ekwam lokokide, koeka; eurupoori ŋes kaiboisike.

²²Naarai ibiri Edeke ŋes komam itimi, tikeker anyoun kakanike.

²³Ibapakinete ituŋa ŋes akanin, isuario konyou kaiboisike.”