Read Ebaibuli 1961 Yob 28 Bible Online

Yob 28 - Ebaibuli 1961 bible

Yob 28

¹“Abeit ejai aipany naebokere epuesa, ka aibois da naka esabu loijililiete kesi.

²Elemunio asua kotoma alup, ido ecalunio aisinit kotoma amor.

³ Itasaŋete ituŋa amuton, ido aitodol oikor lokawasia emoete amor, toma amuton naejesi cucucuc, naka etoribe loka atwanare.

⁴Ebokete apanya kolwaka koreria luka ituŋa; imurwokinete ituŋa luitorete kokujukec, ijululunio kolwaka kituŋa, ijekosi ewai kewai.

⁵Elomunete inyamat kalup, konye kotoma kwap ibelokinio alup kwape kakim.

⁶Amorukec ŋes aibois naka asapiro, ejai da apua naka esabu.

⁷“Emamei akweny nakamejan naejeni erot ŋol, kwabo akonye da nuka etoori mam eanyunete.

⁸Itiaŋ luiturosi mam apotu kicakata, karaida eŋatuny lokadedeŋan mam itorit nen.

⁹Eriori akanike atiida naegogoŋ, ebuburiari iroŋan alemun kageunetekec.

¹⁰Itoitoikini alelesia atibiba; esesenete akonyeke ŋinibore yeniketiai loepol.

¹¹Itikokini icileta kinyeis alel, ka ibore da yenibwaitai itolomuni toma aica.

¹² “Konye do ai bo etakanunia acoa? Ai ca da ejai aibois naka ajenun?

¹³ Mam ituŋa ejenete etiaike, mam da etakani kakwap naka ikajarak.

¹⁴ Ebala ataro ebe, ‘Emamei kamakaŋ.’ Ebala aŋolol da ebe, ‘Emamei kamakaŋ.’

¹⁵ Mam edumunio kanuka esabu, karaida epuesa mam itemio itia eketiai.

¹⁶Mam epedorio aitirian kesabu loka Opir, karaida amor nuemelemeloto nuka akais nuipu, karaida asapiro.

¹⁷Mam epedorete esabu ka agilas ariakakin kaŋes, mam epedorete iboro luka esabu loelai aisiecun ŋes.

¹⁸Mam inerai nuka akoral ka akurusitalo: eebo, etiai loka acoa itelekarit ilulun.

¹⁹Mam atopasit naka Etiopa eriakakinos, mam itirianio da kesabu loelai.

²⁰“Aso ebuni kai acoa? Ai bo da ejai aibois naka ajenun?

²¹Naarai ibwaitai kakonyen nuka ikajarak kere, imunonikinitai akweny nuka apak.

²²Ebalas Amudiar ka Atwanare da ebe, ‘Kipou kapuputu iemutoke kakiikosi.’

²³ “Ejeni Edeke erotoke, ejeni ŋesi aiboisike da.

²⁴ Naarai eseseni aitodol osaŋeta luka akwap, itei da kwap kakuj kere.

²⁵ Iswamaikini ekwam ainiŋet, eebo, itemi akipi kaitemis.

²⁶ Nakibwaikinia akiru ekisil, ka erot loka aimiliaunun nuka eires;

²⁷Kosodi konyet aanyun, ka alimor da, Abu kiticat, eebo, ka aiŋic cut.

²⁸ Kotema ŋesi ituŋa ebe, ‘Koany, ayoŋit EJAKAIT, ŋin ŋes acoa, anyoun karonis da ŋes ajenun.’ ”