Read Ebaibuli 1961 Yob 29 Bible Online

Yob 29 - Ebaibuli 1961 bible

Yob 29

¹Kiyatak Yob akewarag, kotema atiar,

²“Okwe arai kajai kwape kajaar toma olapio luatuboros, kwape kajaar toma apaarasia nukedarenenea Edeke;

³ Nakecaanakinia aketala akouka, aicake ŋes ketotorenenei amuton;

⁴ kwape kajaar kapaarasia nuka akurunanaka, naajaananar aiyeiyea naka Edeke toma owemaka;

⁵Naarokor Lokapedor kere kija keoŋ, Koriŋa ikadwe da kerimorito.

⁶ Nakilosenenere akailameta kakile, atiiba da nakabukonokinia eoŋ icorin luka akinyet!

⁷Nakalomununia kalosenenei orute loka ere, naketemonokinio ekaicoloŋ asisiarin.

⁸Kaanyunete itelepai koŋopete, konyoununete imakio aibwo;

⁹kinyaanakinete ikapolok einer, kipikanakinete akecekanin aitukekec;

¹⁰ kisililiŋai iporotoi luka isotia, kiminaikinos aŋajepakec aŋiiritokec.

¹¹Naarai nakapupununio akit kasodi aimal eoŋ, akoŋu da nakaanyununia koraunun akajenanika:

¹² naarai ayuununei yenikican yenemonyi, ikoki da, yenimam yeniŋarakini.

¹³Kadoik arereŋ naka ŋin kayenaapiarit aolior, ketoyo akalakara etau loka apuserut.

¹⁴ Abu kanap adolit, karapaa; kosubite ekatube bala anapito ka ibore yenitorokino akou.

¹⁵ Karaunun akonye mama ejai yenimuduk, ido karaunun akejen mama ejai yenicodo.

¹⁶ Karaunun papakec kaluilwaritos, kaŋicenenei akiro nuka ŋol kalomam ajeni.

¹⁷Abilenenei abokony naka lomam edolit, keriuni imejauna alemun kokelake.

¹⁸ Kasodi atemar ebe, ‘Atwanikini akaika, ido eyatanakini akapaarasia kwape kasiŋe.

¹⁹ Alianas akalias akipi, ejaenenas akopyo toma atenunaka aitiwalar akwap.

²⁰ Itet akaibuses kaneajai, itet da akakabwa kakanika.’

²¹Kapuponokinete ituŋa kedareunete, kililiŋanakinete ainerunika.

²²Akaulo kakiroka mam bobo kes apotu kinerata, edoikini kes ekainer.

²³Kedarenenete kwape idarere akiru, Eooŋanarete akeceituke kwape eooŋanariata kanuka akiru naka aiporo.

²⁴Abu kamuionor naajuruŋunitotor kesi; mam apotu kituluroto alakara naka akonyeneka.

²⁵Abu kaseanakini ekecerot, keboonokini eoŋ kwape lokapolon, keboienenei kwape ekabaka kajore, kwape loitalakari luibworosi.”