Read Ebaibuli 1961 Yob 31 Bible Online

Yob 31 - Ebaibuli 1961 bible

Yob 31

¹ “Abu ketutuk aitutuket kakonyeka; Aso ti kapedo biai asesen apese?

²Naarai akorakinet anyoin naka Edeke naebuni kokuju, airumet nanyoin da naka Lokapedor kere naebuni kokuju?

³Mam kereka erai epola mama ejai yenimam edolit, ka abili da mama ejaas luiswamaete numam adolit?

⁴ Mam kereka ŋes eseseni ikarotin, imari da akailameta kere?

⁵“Arai kiupanara kaamameak, arai da ewonyarito akakeje aiŋal,

⁶(Mere ketemi kaitemis naerian, tetere ejenuni Edeke abeiteka!)

⁷ arai epaarit akakeju korot, ka ekatau da arai abu kotupa akakonye, ido arai iminaikina aitakinet kere akaninika;

⁸aso mere kaye, konyam ice, eebo, korutoi inyamat lukomanikorika.

⁹“Arai ecodara ekatau mama ejai aberu, arai da aperunit eoŋ kokek loka eidunyeteka:

¹⁰aso kirieik akaberu ice, ido kirukumete ŋes.

¹¹Naarai tierai ŋin naketal, eebo, tierai aronis naibusakinit ikatubok aitican;

¹²naarai erai akim naidopori kiton Amudiario, ido naekoto arutor eiyasika kere.

¹³“Arai abu kamen akirot naka ekakejaanakinan arai naka akakejaanakinan, naketepeseniata,

¹⁴aso ekwaikini ai arai kenyou Edeke? Nakabunokinia, aboŋokini biai?

¹⁵ Lokasubi eoŋ kotoma akoik mere ŋes kesubi ŋes da? Mere ediopet lokiluŋuluŋuuni oni kakoik?

¹⁶“Arai abu kemik lukican yenimielas, arai abu kesiriono akonye nuka apuserut;

¹⁷arai abu kanyam bon akatap, komam ekoki enyamit;

¹⁸(Konye mere, ageun keiditeuka kipoloi keoŋ kwape kaneejai papa, abu karai ekeŋarenikinonike ageun kakoik naka totoka.)

¹⁹Arai abu kaany yenetwani kanuka amamus inapen, arai yenilwaritoi komamei yenikimukis;

²⁰arai aŋabeteke mam kemalat, ido arai mam emwanunit kajulo nuka amerekekika;

²¹arai abu kario akakan mama ejai ikoki, naarai abu kaany aigaŋio korute:

²²kosodi kigwegweun ekeperika kolagagamit, kobila da akoit naka akanika.

²³Naarai abu kakuriana epola loebuni kama ejai Edeke, ido kanuka akepolou mam nuabu kapedo aswam.

²⁴“Arai abu kamunokin esabu, arai da abu katema esabu loejok ebe, ‘Ijo amunonutuka.’

²⁵Arai abu kesiyalamik akabar naapol noi, naarai akeriana akakan;

²⁶ arai abu kasesen akoloŋ naecai, arai elap loelosi iliyai;

²⁷kosodi ekatau aijodoorio kaiyeiyea, akaituk da konu akanika:

²⁸ Ŋin da tierai aronis naibusakinit ikatubok aitican, naarai tikeŋala Edeke loejai toma akuj.

²⁹“Arai abu kesiyalamik amudiar naka ŋol kalokalai, arai abu kekeu nakedoloki ŋes aronis;

³⁰ (Eebo, mam abu kacam akaituk adiakar, toma ailip akeijar elama.)

³¹Ituŋa lukowemaka arai mam apotu kotemasi atiar, “Iŋai epedori adumun ituŋanan yenimam imonikin ikenyamat?

³² Mam ipejonon aperenenei orot; konye abu kaŋaanakini ikaloton ikakekia;

³³Arai abu karap aidiakaka kwape Adam, kanuka aibwa numam adoliteka kotoma atorobuka;

³⁴ naarai abu kayoŋ atukot naepol, kakurianar amwaŋio naka ikekia, tape eliliŋi komam alomari kiŋa—

³⁵Wu okwe arai kejai yenikapupi! (Koany, na ŋes aanyuneteka, kaboŋok eoŋ Lokapedor kere!) Arai kiŋa keoŋ ŋin naewadikat lokasurupika aiwosa eoŋ!

³⁶Abeit tikarioŋ kokeperika, tikaenik kwape kaboke.”

³⁷Tikabilaki ŋes aimwaus naka akailameta, tikekunyaki neejai ŋesi kwape lokapolon.

³⁸“Arai apotu alupoka kiworoto aitepesen eoŋ, ibwololoete da aloboikec nepepe;

³⁹arai abu kanyam akeceraito komam aitac, arai bo abu kedosilana ikulepek,

⁴⁰kobwaŋut ikukwa aibois naka akima, ka igitun aibois naka esairi.” Asana ne akiro nuka Yob.