Read Ebaibuli 1961 Yob 32 Bible Online

Yob 32 - Ebaibuli 1961 bible

Yob 32

¹Kosodete ituŋa ŋul iuni kinyeis aboŋokin Yob, naarai kerai loedolit kakonyeneke elopet.

² Kosodi anyunyura naka Eliku okoku loka Barakel Ebusit, loka ateker naka Ram ainepun: kinepu akenyunyura mama ejai Yob, naarai kitojokikina elopet kwabo mere Edeke.

³Ido kinepu akenyunyura neejaas ikepapero luuni, naarai mam apotu kodumut nabonokino, konye kotubokis aitelekar Yob.

⁴Abu ca Eliku kidarite einer ka Yob, naarai kepolok luce aitelekarit ŋes.

⁵Kosodi Eliku keanyu emamei aboŋokinet kaituke nuka ituŋa ŋul luuni, kinepu akenyunyura.

⁶Kosodi Eliku okoku loka Barakel Ebusit koboŋok ebe, “Arai eoŋ lodidi, yes da imojoŋito noi; ŋes kainakini aitikokina, komam atamakin aitodikin yes nuaomit.

⁷ Atema atiar, ‘Mere kinerata apaarasia, mere aipues naka ikar kisisianakis acoa.’

⁸ Konye ejai emoyo otuŋa, eiyeŋane da loka Lokapedor kere einakini ajenun.

⁹ Ikapolok mere kes lukacoa, karaida imakio mere kes luejenete etube.

¹⁰Ŋes enerar atiar, ‘Kopupunoi; ido etodun eoŋ da nuaomit.’

¹¹“Koany, abu kedarit akirokus, kapupokinite einerikus, naimoiata yesi nuinerasi.

¹² Eeba, ketoikinit akit neijaas, ido koany, emamei loitelekarit Yob, karaida loeboŋokini akekiro, kotomakus.

¹³ Kocoitos kinyeis einer ebe, ‘Kidumu acoa; epedori Edeke aipikor ŋes, konye mere etuŋanan.’

¹⁴Naarai mam abu kitemoki ekeiner mama ajai eoŋ, kwabo mam aboŋokini ŋes koinerikus.

¹⁵“Eumokinitos, mam bobo eboŋokinete: emamei akirot nainerasi.

¹⁶Ido edari kereka eoŋ da, naarai mam inerasi, naarai ebwoete atai, komam eboŋokinere?

¹⁷Aboŋokini eoŋ da nuka, etodiari eoŋ da nuaomit.

¹⁸Naarai ileleba eoŋ akiro, naarai ketiŋaikinit emoyo loejai tomakaŋ.

¹⁹Koany, eputosi akoikika ebino loemamei neelomunia, kwape iriagin lukitetiak luka imukulen, eapie acila.

²⁰Kebusakinit einer tetere ebworari, aooŋi akaituk aboŋokini.

²¹Keŋaiŋait, kenyek atiakatiak ituŋa; karaida aijodijod idiotuŋanan kere.

²² Naarai mam ajeni aijodijod; tikalema Lokasubanika eoŋ katipet.”