Read Ebaibuli 1961 Yob 39 Bible Online

Yob 39 - Ebaibuli 1961 bible

Yob 39

¹“Ijeni kereka ijo apak naeuriata akinei nuka ais nukomoru? Iseseni ijo naiwacuniata amiameik?

²Ipedori kereka ijo aimar ilapio luedaunete kesi? Arai bo ijeni ijo apak naeuriata?

³Ekukumete, euriete ikecedwe, ecakarete aitururukec.

⁴Etumete idwekec, epolokinete ais; enyounete, komam eboŋunete bobo.

⁵“Iŋai bo kisilapadai etuko? Arai bo iŋai kelacakini aeneta nuka etuko?

⁶ Abu keswamak eketogo amodiŋ, akwap naka abalaŋ da akeibois.

⁷Emwaŋit ŋesi ecelet lokore, kwabo mam iirari eporoto loka ekameeton.

⁸Alalau naka iroŋan ŋes eronyike, Emoot ŋinibore kere yenelibuni.

⁹“Ecamuni tope ekosobwan aijaanakin jo? Arai bo aiboienen kaujokon?

¹⁰Ipedori kereka ajen ekosobwan kaenetake kotoma aloboi? Arai bo ekoriei aditon kokaukon?

¹¹Imunonena kereka ijo ŋes, naarai epol akegogoŋ? Arai bo inyeanakinia ŋes aitaaritoikon?

¹²Imunonena kereka ijo ŋes, ainyakun ikinyomokon ore, Atukonokin da alos kopejalikon?

¹³“Abebenoka nuka ekuulu iyalamasi; Konye bo abebenokake ka akuuluike esiaka?

¹⁴Naarai inyeini abeeike kalup, kosodi aitwamanaun kapua.

¹⁵Kosodi aimurwokin ebe epedori akeju abulubul, arai etiaŋ loka ais epedori aicakacak.

¹⁶ Ededeŋikini idweke bala lumere luke; karaida kitaaritoi atai, mam ekurianar;

¹⁷ naarai abu Edeke kolema ŋes acoa, kwabo mam koinak ajenun.

¹⁸Naedakununor akerit, emwaŋi ebalasit ka ekebwanenonike.

¹⁹“Ibu ca ijo koinak ebalasit akegogoŋ? Ibu kitanap ŋes esigigirike loejaŋijaŋi?

²⁰Ibu ca ijo koinak ŋes adesitoi kwape kemaase? Aruoke nakaŋosibib erai naketasuro.

²¹ Ekuri toma aditot, isiyalamikinit akegogoŋ: elomari airiamun kituŋa luekapito lujiis.

²²Ekienar akurian, mam eburuni; kwabo mam eboŋori kau kaneejai ekileŋ.

²³Eruosi imalia wokowok kaneejai ŋesi, akwara naemwekimweki ka ebuku.

²⁴Ilikori alup kadedeŋ ka anyunyura; mam ecamuni abwoun kepupu arupepe.

²⁵Ŋinipak naeruor arupepe, ebala ebe, ‘Ece!’ Iŋuuni ejie kama elwana, airetun naka ikayaitok ka ecelet.

²⁶“Acoakon ŋes kereka epororia ekokom kuju noi, eterari abebenokake aibwot ari naka eŋalakimak?

²⁷ Edokari kereka emorukaalet kaicorakinetekon, koduk akaike kuju?

²⁸Iboie kamor, eketogo da ejai nepenen, adoketa nuka emoru, kaibois naegogoŋ.

²⁹Kanen irerei imejan: egiparete akekonye kaneelwana.

³⁰ Ijujuete ikedwe aokot: ido neejaas luearitai, nepenen da ejai ŋesi.”