Read Ebaibuli 1961 Yob 4 Bible Online

Yob 4 - Ebaibuli 1961 bible

Yob 4

¹Kosodi Elipas Etemanit aboŋokin, kotema atiar:

²“Arai etamakini etuŋanan einer kajo, inyunyurikini? Konye iŋai itikokin kinyek einer?

³Koany, ituutoo luipu, ibu kitogogoŋ akanin nuekalanyaka.

⁴Apotu akonikiro kigaŋata ŋin yenikibiror, ibu kitogogoŋ akuŋin nuelejekekas.

⁵ Konye kwana adolut mamakon, iilor; kitirosi, iyaloŋoŋ.

⁶ Akoniiyoŋ Edeke mere ŋes kigagauni? Atenit naka ikonirotin da mere ŋes akonimunonut?

⁷“Keŋaiŋait, kiitu, iŋai abu kooliorite, komamei akirot? Arai luetenito kotauon ai bo emudiaritere?

⁸ Kwape abu kaanyunia, ŋul luekoriete numam adolit, lueyeete ameŋeranut, esakete ŋupeŋun.

⁹Eoliorete kanuka eiyeŋane loka Edeke, epiaros da kanuka akutun naka akenyunyura.

¹⁰ Agat naka eŋatuny, ka eporoto loka eŋatuny lokadedeŋan, ka ikel luka iŋatunyo ludidik, ebilasi.

¹¹ Etwani eŋatuny lomojoŋ keolikis imejan, kisiarakinos idwe luka aŋatuny.

¹²“Aponi kacedakin akirot, kopupok akakit aiyeiyeakeŋ.

¹³ Kotoma aomisio nuelomunete kaitapoeta nuka akuare, nailuranariata ituŋa ajo nuipu,

¹⁴kabunok akurian ka amaran, naelokilokete akakojo kere.

¹⁵ Kosodi kitor emoyo kakonyeneka; kobalasi itima luka akouka sau sau.

¹⁶Kobwoi kopalarite, konye mam abu kapedo amisiikin kwape eputor; kojai etoil kakonyeneka: kidasite tiiti, kosodi apupun eporoto loebala ebe,

¹⁷‘Epedori kereka etuŋanan loetwani araut loedolit kakonyen nuka Edeke? Epedori kereka etuŋanan araut loesega kakonyen nuka Ekasubanike?

¹⁸ Koany, mam emunokina ikekejaanakinak; Itepeseni da ikemalaikan kanuka apaarikec:

¹⁹Itelekarit cama aitepesenit ŋul lueperete otogoi luka alup, apetetaitikec ejai toma apua, luidecidecio kwape ikaporipor!

²⁰Emudiaros kotoma apak naejai kidiŋ atupuruc ka eboŋ, eoliorete ikar kere komam yenibwaikinit etau.

²¹Mam kereka eutunio auno nakotoma owemakec? Etwakete, komam adiocoa kere.’ ”