Read Ebaibuli 1961 Yob 40 Bible Online

Yob 40 - Ebaibuli 1961 bible

Yob 40

¹Kosodi bobo koboŋok EJAKAIT Yob kobala ebe,

² “Itepegi kereka loiulana Lokapedor kere? Loitonolopi Edeke, koboŋok ŋesi.”

³Kosodi Yob aboŋokin EJAKAIT, kobala ebe,

⁴ “Koany, mam eoŋ arai ibore; kaboŋokini anu? Abun akaituk.

⁵Ener irwan atipet, mam aboŋokini; eebo, irwan aarei, konye mam bobo eyatakini.”

⁶ Kosodi koboŋok EJAKAIT Yob kotapipirio, kobala ebe,

⁷ “Koen do aŋabetekon kwape kekiliokit: keŋisi, ijo da koboŋok.

⁸ Ilocokini kereka ijo etubeka loatubit? Itetelekari kereka ijo eoŋ akirot, tetere iraun loedolit?

⁹ Arai ca ijaas kakan naka Edeke? Ido ipedori tope airetun keporoto loeputos kalokeŋ?

¹⁰ “Konap cani ijo ajokis ka ayoŋit; kisiri aibuses ka apolou.

¹¹Kobuko nuilapanaros nuka anyunyurakon; kosesen ŋinituŋanan yeniturokina, kitisil.

¹² Kosesen ŋinituŋanan yeniturokina, kijesa; kicakacak ikaronok kaneebwoiata.

¹³Kitonop kes nepepe kotoma alup; koen akonyenekec kaibois naibwaitai.

¹⁴Kasodi eoŋ da alimori jo ebe, epedori akanikon nakoteten aitajar jo.

¹⁵“Koany do emiria loasubuni nepepe kajo; enyami inya kwape kemon.

¹⁶Koany do, ejai akepedor toma aŋabetekeŋ, ido akegogoŋ toma akiriŋ naka akoikike.

¹⁷Ekosi ekorike kwape eres, imorikikina aputio nuka amurwosike.

¹⁸Eputosi akekojo kwape ipiin luka aisinit; akejeke da kwape atiketa nuka asua.

¹⁹“Epol korotin luka Edeke: Ŋes elopet lokesubi epedori aisukunyikin ekekileŋ.

²⁰ Abeit itolomunete iroŋan ikenyamat, neeboliananatar itiaŋ kere luka ais.

²¹Eperi ŋesi kwap kikito luketolim, kaŋopis naka esege ka erit.

²²Ikito luketolim imukorete ŋes kitolimokec. Kirimorito ikito lukaguurut.

²³ Koany, arai ilapanari ecor, mam emarani: icasi, karaida kiboru Yorodan kiton aitukuke.

²⁴Epedori bo ituŋanan aikamun ŋes naeŋoliaria, arai kicum ekumeke kedobo?”