Read Ebaibuli 1961 Yob 41 Bible Online

Yob 41 - Ebaibuli 1961 bible

Yob 41

¹ “Ipedori kereka ijo amun akinyaŋ kegolu? arai bo aridakin aŋajepeke kauno?

² Ipedori tope aridakin auno okumeke? Arai bo aicum abokonyoke kemutu?

³Kimaimai kereka ŋesi jo nuipu? Arai bo kilimokini ŋesi jo nuepataka?

⁴Itutukete kereka ŋesi kajo aitutuket, tetere iyaŋaari ŋes araut ebulesit apaarasia kere?

⁵Iboliasi kereka ijo kaŋes kwape iboliatar kikweny? Arai bo aenikin ŋes akonipesur?

⁶Egwelarete kereka ikodeta luka ikalokak ŋes? Ekoranakinete tope ikagwelanarak?

⁷Ipedori kereka aileleb emukuleke kasua nuejaas igoluna? Arai bo akouke kimacarin?

⁸Kidokok ŋes akonikan; kiitu ejie ŋol, kinye aiyatakin aswam kwaŋin.

⁹Koany, amunoke atai: nakeanyunia ituŋanan ŋes mam kereka ibirori?

¹⁰ Emamei ekadedeŋan loetitiŋikini atwarun ŋes: aso ai bo ejai yenepedori aibwo kakonyeneka?

¹¹ Iŋai bo gwai keesiauni aijaikin ibore, katacak eoŋ ŋes? Kere luejaas kwap kakuj eraas lukaŋ.

¹²“Mam eoŋ enyeini alimor aketutubeta, karaida agogoŋuke naepol, karaida asubuneteke naejok.

¹³Iŋai bo epedori alacar inapeneke lukokuju? Iŋai bo da edoliori toma arukanasiake aarei?

¹⁴Iŋai bo da epedori aŋaar ikirigin luka akonyeneke? Irimorit etasuro ikekel.

¹⁵Aabeleke nuegogoŋ ŋes eiturike, nuimorikikina kwape aanyunet naipucuc.

¹⁶Idunyanara noi, mam epedori ekwam aitor kokidiŋikec.

¹⁷Inicakina; iminaikina, komam epedorete atiak.

¹⁸Eikaresoneke isimwekimweki aica, akonyeneke da eputosi abukio nuka atupuruc.

¹⁹Elomununete akalasia nuenokete kaitukuke, eporonunete atwenyitweny nuka akim.

²⁰Elomuni apuru kokumesike, kwape kamot naekulai ka aladoi nuicweio.

²¹Isinepuni eiyeŋaneke atotol, ido elomununei akim kaitukuke.

²²Iboie agogoŋ komurisiŋike, ikosie etasuro kakonyeneke.

²³Inicakina aolokony nuka akiriŋike: imakakina; mam epedorete alemario.

²⁴Egogoŋ eketau kwape amoru, eebo, egogoŋ kwape kakukuse.

²⁵Naenyounio ekuriakaros ikagogoŋok: ikerepikinete kanuka aburun.

²⁶Arai kicumi kekileŋ, mam epedori ibore, karaida akwara, karaida emacar, karaida emal loeit.

²⁷Itaraunit asua bala ariaŋ, aisinit da bala akito nuebosito.

²⁸Mam epedori ekojo aiteker ŋes: alica da nueporocio eraunos ariaŋ kamakeŋ.

²⁹Itaraunio ibotei bala ariaŋ: ekienar agumar naka eliru.

³⁰Atutubetake nukokwap eputosi katiboloka nuekwaka: aootoke korit esubit bala agali nakicomis.

³¹Itukulauni ataro kwape kamot: ituputori aŋolol akinyet.

³²Itacauni ekerot kokauke; tiaomitai ataro araut akako.

³³Emamei yeneputosi kaŋes kakwap, yenesubitai komam akurian.

³⁴Eseseni ŋinibore yenejai kuju: ŋes ekabaka loka idwe kere luka eitur.”