Read Ebaibuli 1961 Yob 5 Bible Online

Yob 5 - Ebaibuli 1961 bible

Yob 5

¹“Kiworo cani; ejai yenikibonokini jo? Iŋai ka lukalaunak loibelokin jo?

²Naarai eari anyunyura etuŋanan lobaŋ, ekokote da eari lomam acoa.

³Abu kaany lobaŋ eremori alias; konye kelamak katipet aiboisike.

⁴Kolwanik idweke ainapakin, koridakinai korute komamei yeneyuuni kes.

⁵Enyami yenikeriebi eteŋei nuedwenyete, elemununei da kokukwa, ilikonori da yenikakure iborokec.

⁶Naarai mam elomunete numam adolit kotoma apua, karaida ican abwaŋun kalup;

⁷konye etuŋanan eurikinitai ican, kwape edetarotor atwenyitweny kuju.

⁸ “Konye eoŋ, ti akoto amoot Edeke, ido ti akoto aititiŋ Edeke akakiro:

⁹loiswamai nuepolok numam emounos; nukaumokin numam imarunos:

¹⁰loisitepi akiru akwap, loijukari akipi omanikoria:

¹¹kosodi adakakin ŋul luejaas kwap; edakuni ŋul luibworos toma ainapakin.

¹²Itapalauni ainerun naka luepiriaka, tetere mam epedorete akecekanin aswam nuepeleunete.

¹³ Isipoki lukacoa kapirianutukec: isurukanyari aitanaŋ ainerun naka lukelepa.

¹⁴Iriamete kamuton paaran, erarapitos kidiŋ paaran bala kuare.

¹⁵Konye itajari kokileŋ loka aitukekec, itajari yenipuda kakan naka lokagogoŋon.

¹⁶Kwaŋin ejai lokican kamunonut, ebutarete numam adolit.

¹⁷ “Koany, elakar ituŋanan yenitoroni Edeke; aso sirikimen alecor naka Lokapedor kere.

¹⁸ Naarai isiriebi, ido imadi; imusuŋi, ido akaninike kes itaŋaleunete.

¹⁹ Kiyuununei ŋesi jo katiokisio akanykape; eebo, kakanykaarei mam kitirori jo aronis.

²⁰Kilakununei kobeli komam itwani; kojie da kapedor naka ekileŋ.

²¹ Kibwaio jo kama ejai edaset loka aŋajep; mam da ikurianari amudiario naebunio.

²²Ikienar amudiario ka ebeli; mam da ikurianari itiaŋ luka akwap.

²³ Naarai itutukete aitutuket kamor nukomanikor; inapakinos itiaŋ luka ais kajo.

²⁴Ijenuni kwape inapakinor ekoniwema; ido imanimani ekonisipan komam itwaniari ibore.

²⁵Ijenuni da ebe akoniwur elalaari, itataikon da kwape anya nuka akwap.

²⁶Idolokini ailitikon kobusite ikar luipu, kwape elomunia eisuta loka akima kokaruke.

²⁷Koany ŋun, kipou kanicutu, ikote nen: kepup, kojen ijo kosodi kojaun ejok.”