Read Ebaibuli 1961 Yob 6 Bible Online

Yob 6 - Ebaibuli 1961 bible

Yob 6

¹Kosodi koboŋok Yob kotema atiar:

²“Arai kiŋiŋitete anyunyuraka, arai kibwaikinitete nepepe kepolaka toma aitemis!

³Naarai kwape kwana ti do kitelekasi alaŋir naka asiŋe naka aŋololin: kanuka ŋun ŋes esunyitor akakiro.

⁴ Naarai ejaas imalia luka Lokapedor kere kotomaka, emasi ekamoyo aisoritike; iderakina etasuro loka Edeke asurokin eoŋ.

⁵Emonyi kereka asigiria naka ais arai eja ŋes anya? Arai emoŋ aruo kojaas inyamatake?

⁶Ipedori kereka ainyam luepiaka komamei abalaŋ? Arai bo ejai ibore yenebala jel osirapurapu loka abeet?

⁷Eŋerit ekatau atiror kes; esubitos bala lunyaman luketal kaneajai.

⁸“Karai kapedoo adumun nuelipit; tikainak Edeke eoŋ nueŋobelei!

⁹Tikisiyalamik Edeke aidecidec eoŋ; tikejal akekan, kagela cut!

¹⁰Ŋes konyet adumunia aitalakario; eebo, tikecur kanuka ariebo namam etimi; naarai mam anerenenei akiro nuka Lokalaunan.

¹¹Agogoŋuka ŋes bo inyo, kedareu? Awasiaka da ŋes bo inyo, katitiŋik?

¹²Erai tope agogoŋuka agogoŋ naka amor? Arai akakuan naka aisinit?

¹³Konye abeit emamei yenikeŋarakini kotomaka, Ereŋear da aswam nakapirianut kama ajai.

¹⁴“Ibusakinit ekepapero aitodiar asianut mama ejai ŋol loekoto aiilor; ŋol da loinyeini ayoŋit Lokapedor kere.

¹⁵Iŋalaŋalas ikainacan bala aguurut, bala ecilet loka aguurun nueoliorete;

¹⁶nuirioko cucucuc kanuka akipi nuikamunito, ŋes neenopia akaka:

¹⁷kapakio nuka amwanis, ilicaros; naejaenenara aibuse, eonikinete kaiboisiokec.

¹⁸Epaarete ikalotok luelosete aririkec; elosete toma amodiŋ, eoliorete.

¹⁹Apotu ikalotok luka Tema kiteoto, kidareut atukon nuka Seba kes.

²⁰Kirumata ileic naarai apotu komunokinos; keporu ŋina kitirirata.

²¹ Aso yes da ikote nen kaneajai; ianyunete yenikitukuriani, ikuriakaros.

²² Abu kereka kalimokinite yes ebe, ‘Koinakinai’? Arai ebe, ‘Koinakis koborokus araut ainakinet kanukaŋ’?

²³Arai ebe, ‘Koyuunai kakan naka lokasurup’? Arai ebe, ‘Kolakunai kakan naka ikareitok’?

²⁴ “Kisisianakinai, eoŋ da eliliŋi: Kitejenunai neapaaritor.

²⁵Akiro nukaitenara eraas ca nukagogoŋ! Konye epegetekus itoroni inyo?

²⁶Iwomitos aitoron akiro? Naarai einer loka ŋol kaloejuruŋuŋit esubit bala ekwam.

²⁷Eebo, tikilamilamata eroet kanuka ikoki, Tikimutunoto kaneejai opaperokus.

²⁸Aso do kiyuutu kosesenata eoŋ; naarai abeit mam eŋalai kakonyenekus.

²⁹Kibelokinos, keŋaiŋait, kinyeis numam ebeito ajakut; eebo, kibelokinos bobo, edolit akakirot.

³⁰ Ejaas numam ebeito kotoma aŋajepeka? Mam epedori akainyigol amisiikin nukameŋeranut?”