Read Ebaibuli 1961 Isabulin 109 Bible Online

Isabulin 109 - Ebaibuli 1961 bible

Isabulin 109

¹Loka Ekapolokiton lueruos. Esabuli loka Daudi. Sirikililiŋ, wu Edeke loeturenenei;

²Naarai kaooŋikis ikaronok ka ikeŋalak akeceituke: Enerata keoŋ kaŋajep naeŋalai.

³ Kalukut kakiro nuka alait, Ketijioto da komamei akirot.

⁴Itia aminaka ŋes araunotor lukasurupoka: Konye elipenenei eoŋ.

⁵ Karopata eoŋ aronis itia ajokis, Ka alait da itia akamin.

⁶Kodakak ijo ekaronon ayait ŋes: Kitobwo da lokasurup kakanike nakoteten.

⁷ Naetubokinere ŋes, kolom itelekarito akiro; Kitaraunai da akeilip adiakaret.

⁸ Kikidiokoto akepaarasia; Koyaŋa ice akeibois.

⁹ Koraunos ikedwe luemameete papakec, Akeberu da apuserut.

¹⁰ Koraunos ikedwe ipasoi, inyamuren da; Komoata inyamat kaneelwana anyoun koreriakec luatiyanakinos.

¹¹ Koyaŋa lokapeseneke kere luejaatar ŋesi: Koŋatasi imo ikorionoke.

¹²Komamuun yeniswamakini ŋes nukasianut; Komamuun da yenitimi idweke luemamei papakec.

¹³ Kitanaŋai aurike; Komwatarai da ekecekiror katuri naetupakini.

¹⁴ Kiitu EJAKAIT numam adolit nuka lukapapaake; Sirikemwatar aronis naka totoke.

¹⁵ Kojaenenas kesi kakonyen nuka EJAKAIT ducuduc, Tetere itanaŋi aiitunetekec kakwap.

¹⁶Naarai mam abu kiitu aitodun aitim, Konye irigai yenikican ka yenilwaritoi, Ka yenebilil etau, aiar kes.

¹⁷Eebo, amina ŋesi ekenit, kobunok ŋes; Mam abu kisiyalamik ailipakin arereŋ, kolwanari do kamakeŋ.

¹⁸Konap ekenit bala anapitoke, Koloma da tomake bala akipi, Ido bala akinyet toma akojoke.

¹⁹Koraun kamake bala anapito naerapitor akekuan, Ka amuny da naeenitor ŋes duc.

²⁰Ŋol ŋes eropit loka lukasurupoka kama ejai EJAKAIT, Loka ŋul da luineras nueroko aluikin ekatau.

²¹Konye wu Edeke EJAKAIT, kiswamakinai, kanuka ekirorikon; Naarai ejok aitimikon, koyuunai.

²²Naarai ecana ido elwaritoi, Ekatau da imusuŋitai kotomakaŋ.

²³Alosi bala etoribe loeoliori; Kelakilakar eoŋ bala emaase.

²⁴ Anonokata akakuŋin kanuka aikany eteŋei; Adokoror akakuan.

²⁵ Araun eoŋ amorosit kamakec: Nakaanyuniata eoŋ imuŋumuŋete akecekwes.

²⁶Wu EJAKAIT Ekadeke, kiŋarakinai; Okwe, kitajarai kwape ejaar akoniitim:

²⁷ Tetere ejenunete ebe ŋin ŋes aswam naka akanikon; Ebe ijo, EJAKAIT, ŋes iswama.

²⁸ Kikenoto kesi, konye kisirereŋ ijo: Naenyounioto, irumete ileic, konye eleli ekonibulesit.

²⁹Kitanapai lukasurupoka aitisilio, Kimukoros da ikeceleic bala elou.

³⁰Emalaenenei noi EJAKAIT kaitukuka; Eebo, eturenenei ŋes kokodet.

³¹Naarai ebwoenenei ŋesi kakan nakoteten naka yenilwaritoi, Aitajar ŋes kama ejaas luetubokinete eketau.