Read Ebaibuli 1961 Isabulin 115 Bible Online

Isabulin 115 - Ebaibuli 1961 bible

Isabulin 115

¹ Mere mamakosi, wu EJAKAIT, mere mamakosi, Konye koinak ekonikiror aibuses, Kanuka aitimikon ido kanuka abeitekon.

² Kanukinyo etemariata atekerin ebe, “Ai bo kwana ejai Edekekec?”

³ Konye Edekewok ejai toma akuj: Eswama nuepuda elopet.

⁴ Eraas aputosiakec epuesa ka esabu, Aswam naka akanin nuka ituŋa.

⁵Ejaas aituke, konye mam ineras; Ejaas da akonye, konye mam esesenete.

⁶Ejaas aki, konye mam epupete; Ejaas da ikumes, konye mam iŋuunete.

⁷Ejaas akanin, konye mam itiŋere: Ejaas da akeje, konye mam elosete, Mam ineras kiporotoikec.

⁸ Ŋul luesubete kes eputokinos kakes; Eebo, ŋinidiopet yenemuno kes.

⁹ Wu Isirael, komunonena ijo EJAKAIT: Erai ŋesi ekeŋarakinanikec ido ekecebuku.

¹⁰ Okwe ekal loka Aaron, komunonena EJAKAIT, Erai ŋesi ekeŋarakinanikec ido ekecebuku.

¹¹Yes luiyoŋito EJAKAIT, komunonenasi EJAKAIT: Erai ŋesi ekeŋarakinanikec ido ekecebuku.

¹² Naarai abu EJAKAIT kiitu oni; kisirereŋi ŋesi oni: Isirereŋi ekal loka Isirael, Isirereŋi ekal loka Aaron.

¹³ Isirereŋi ŋul lueyoŋito EJAKAIT, Kere lukapolok ka ludidik da.

¹⁴Kiyatanak EJAKAIT yes noi noi, Yes ka ikusidwe.

¹⁵ Isirereŋitoi yes kama ejai EJAKAIT Lokesubi akuj ka akwap da.

¹⁶Akuj ŋes akuj naka EJAKAIT: Konye akwap abu koinak idwe luka ituŋa.

¹⁷Mam ikatwak iturito EJAKAIT, Karaida ŋul kere luijesaros toma aililiŋ.

¹⁸ Konye oni kiturenenei EJAKAIT, Amear kapak kana aitodol ikar kere. Kituroto yesi EJAKAIT!