Read Ebaibuli 1961 Isabulin 116 Bible Online

Isabulin 116 - Ebaibuli 1961 bible

Isabulin 116

¹Amina eoŋ EJAKAIT, naarai eira Ekaporoto ka akaiŋaiŋa.

²Naarai ketoiki akekit, Ŋes do ewonenenoo ŋes apaarasia kere nuka akaijar.

³Kalukunito aunoi nuka atwanare, Ketiŋa eoŋ ariebesia nuka Okatwak, Adum ican ka aiturur.

⁴Ŋes do ewoneo ekiror loka EJAKAIT ebe: “Wu EJAKAIT, keŋaiŋait jo, koyu ekatau.”

⁵ Esiana EJAKAIT, ido edolit; Eebo, itimono Ewokodeke.

⁶Idari EJAKAIT ijimat: Aponi ketisili konye ketajar ŋesi eoŋ.

⁷ Okwe ekatau, koboŋ toma aibworarikon; Naarai kikonak EJAKAIT nukajokak.

⁸Naarai iyuu ijo ekatau katwanare, Akakonye da kakiyo, Ka akakeje da kotoma aibiror.

⁹Alosenenei kakonyen nuka EJAKAIT Kakwap naka ikajarak.

¹⁰ Eyuunit, naatemaria ebe, “Aponi keticani noi”:

¹¹ Alimuni kamarani ebe, “Eraas ituŋa kere ikeŋalak.”

¹²Inyo bo ainakini eoŋ EJAKAIT Kanuka ajokisioke kere nukekonaki ŋesi eoŋ?

¹³Ayaŋaari aikopo naka aitajario, Kasodi aiwone ekiror loka EJAKAIT.

¹⁴ Ataci akaiyaposio mama ejai EJAKAIT, Eebo, kakonyen nuka iketuŋa kere.

¹⁵ Atwanare naka lukalaunakake Erai naketiai loepol kakonyen nuka EJAKAIT.

¹⁶Wu EJAKAIT, abeit arai eoŋ ebulesitikon: Arai eoŋ ebulesitikon, okoku loka akonibulesit; Ijarijarak ijo aunoi nukaenito.

¹⁷Ainakini jo asubanit naka aimal, Ido ewonei ekiror loka EJAKAIT.

¹⁸Ataci akaiyaposio mama ejai EJAKAIT, Eebo, kakonyen nuka iketuŋa kere;

¹⁹Kalaroi nuka etogo loka EJAKAIT, Kokidiŋikon, wu Yerusalem. Kituroto yesi EJAKAIT!