Read Ebaibuli 1961 Isabulin 147 Bible Online

Isabulin 147 - Ebaibuli 1961 bible

Isabulin 147

¹Kituroto yesi EJAKAIT! Naarai ejok ayoore aiturit Edekewok; Naarai ejok, ibus aiturit.

² Eduki EJAKAIT Yerusalem; Etukonokini luaponi kireŋeai koIsirael.

³ Itaŋaleuni ŋesi luejaas itauon luebilil, Eeni da amusuŋunukec.

⁴ Imari ŋesi etiai loka aacer; Emaanakini kes kere ikecekiroria.

⁵ Epol EwokoJAKAIT, egogoŋ kapedor Aijeneke mam imarun.

⁶ Igaŋit EJAKAIT luitasonos, Ecakakini ikaronok kwap.

⁷ Koyeikisi EJAKAIT kaimal; Koyeikisi aiturit Edekewok kadeudeu:

⁸ Loerapakini akuj kidouon, Itemokini akwap akiru, Isibwaŋuni inya koroŋan.

⁹ Einakini itiaŋ ikecenyamat, Ikuruka da ludidik luemonyete.

¹⁰ Mam isiyalamikinit agogoŋ naka ebalasit; Kwabo mam itojokit akeje nuka ituŋanan.

¹¹Itojokit EJAKAIT ŋul lueyoŋito ŋes, Ŋul luemunos akeitim.

¹²Ijo Yerusalem, kiturite EJAKAIT, Ijo Sion, kiturite Edekekon.

¹³Naarai etogogoŋ atiketa nuka iruteikon; Esireren idwekon kotomakon.

¹⁴Eyauni ainapakin oikorunokon; Kisimonikini jo apokoi nuka akima.

¹⁵ Ijukuni aicorakineteke toma akwap; Etirono akekirot.

¹⁶Ekori ŋesi akako kwape kajujo nuka amerekek; Ebwasi akopyo nuidoudouto kanuka aaterot kwape kekurwon.

¹⁷Ecakanari akekipi nuerurwakito kwape kararasia; Iŋai bo epedor abwoikin aaterotoke?

¹⁸Ijukuni akirotoke, ecalari kes, Itukusi ikwaminike, elelearete akip.

¹⁹ Itodikinit Yakob akekirot, Ka Isirael da ikisilake ka itubesiake.

²⁰ Mam iswamakinit adioceteker kwaŋin; Mam ejenunito itubesiake, Kituroto yesi EJAKAIT!