Read Ebaibuli 1961 Isabulin 148 Bible Online

Isabulin 148 - Ebaibuli 1961 bible

Isabulin 148

¹Kituroto yesi EJAKAIT! Kituroto yesi EJAKAIT kokuju: Kituroto ŋes kaneicelelei.

² Kituroto ŋes, yes ikemalaikan kere: Kituroto ŋes, yes akejore kere.

³Kituroto ŋes, ijo akoloŋ ka elap: Kituroto ŋes, yes aacer kere nuicaete.

⁴ Kituroto ŋes, yes akuj naka akuj, Ka yes da akipi nuejaas kuju kakuj.

⁵ Kituroto ŋul ekiror loka EJAKAIT: Naarai abu kicorak, kosubunai.

⁶ Eticat da kes ikar kere: Esilaki ekisil lomam edaun.

⁷ Kituroto EJAKAIT kakwap, Yes akinyana, yes da ataroi kere:

⁸Akim ka akako, akiru ka ilisinai; Ekwam loeiliili, itodolete akekirot.

⁹ Iroŋan ka iukon kere; Ikito lueraete noi ka iresia kere:

¹⁰Itiaŋ ka ibaren kere; Iboro lueliatos ka akweny nueporitos.

¹¹ Ikabakan luka akwap ka ituŋa kere; Ikapolok ka ikatubok kere luka akwap:

¹²Isap ka apesur; Imakio ka idwe da.

¹³ Kituroto ŋul ekiror loka EJAKAIT; Naarai ekekiror bon itopolooritai: Akeibuses edeparit akwap ka akuj da.

¹⁴ Ekeu ŋesi amumwarat naka iketuŋa, Aiturit naka lukalaunakake kere; Kes idwe luka Isirael, ituŋa luidunyas kaŋes. Kituroto yesi EJAKAIT.