Read Ebaibuli 1961 Isabulin 22 Bible Online

Isabulin 22 - Ebaibuli 1961 bible

Isabulin 22

¹Loka Ekapolokiton lueruos; aruo naka Amiam naka Acila kide. Esabuli loka Daudi. Wu Ekadeke, Ekadeke, kanukinyo kijalakinia? Kanukinyo ilwaniaror aiŋarakin eoŋ, kakiro nuka aumenoka?

²Wu Ekadeke, eworoi paaran, konye mam iboŋokini; Kuare da mam eliliŋi.

³ Konye irai ijo lokalaunan, Ijo loiboie kotoma aiturit naka Isirael.

⁴Kimunonenos jo lukapapaakos: Kimunonenos, ibu koyuununei kes.

⁵Kiworoenenete jo, koyuununete: Kimunonenos jo komam irumenenete ileic.

⁶ Konye eoŋ arai iritanit, kwabo mam arai ituŋanan; Imoromorot ka imenitono da yenika ituŋa.

⁷ Kakienatatar lukaanyunete kere, kesekelete: Isuanaros, imuŋumuŋete akwes, kineras ebe,

⁸ “Koluŋakin neejai EJAKAIT; tetere eyuuni ŋes; Tetere eyuuni ŋes, naarai elelakinit ŋes!”

⁹Konye ijo ŋol lokisidouni eoŋ kakoik naka totoka: Lokisumunoori da aroko anaki.

¹⁰Aponi ketitiŋi jo ameuni kaurunioka: Ijoŋ Ekadeke ameuni kakoik naka totoka.

¹¹Sirikilwaniar kaneajai; naarai eapie aronis; Naarai emamei yenikeŋarakini.

¹²Kerimorito imaseniko luipu; Kerigaunito imaseniko lukagogoŋ luka Basan.

¹³ Kaoonanakinete aitukekec, Kwape eŋatuny loikuna loegat.

¹⁴Kabukor kwape kakipi, Elionyonokinos akakojo da kere: Esubit ekatau bala edipor; Acalar kokidiŋ amoetenaka.

¹⁵ Aono akagogoŋ bala atibolok; Emakakin akaŋajep abokonyaka, Kiyau da toma apua naka atwanare.

¹⁶ Naarai kerimorito iŋokwo: Karidakinit atukot naka lukeswamak aronis; Kecumata akakanin ka akakejen.

¹⁷Apedori aimarun akakojo kere; Kasesenete kedetakinito akonye:

¹⁸ Akorokorata akanapito, Kilamilamata eroet kanuka ekasoka.

¹⁹Konye sirikilwaniar, wu EJAKAIT! Ijo ekakenarakinan, kiwonyuni aiŋarakin eoŋ.

²⁰Koyu ekatau kokileŋ; Iminataka kapedor naka ekiŋok.

²¹ Kitajarai kotoma aituk naka eŋatuny; Eebo, ibu Koboŋok da kamumwar nuka ekosobwan.

²² Alimonokinenei ekonikiror mama ejaas iinacanaka: Keturenenei jo kokidiŋ katukor.

²³Kiturito ŋes, yes luiyoŋito EJAKAIT! Kitopoloonorete ŋes, yes kere aur naka Yakob; Koyoŋenenete ŋes, yes kere aur naka Isirael.

²⁴Naarai mam abu komen kwabo mam abu kola Ican luka iŋol kaloiticanio; Kwabo mam abu kibwa akekonyen kamakeŋ; Konye naeworoo, abu kiira.

²⁵Mamakon ŋes elomunia aituriteka kotoma okodet loepol: Etodoli akaiyaposio kakonyen nuka ŋul kalueyonito ŋes.

²⁶ Enyamete luitasonos kimonikinos: Iturete EJAKAIT ŋul luemootos ŋes. Kojarenenete ikusitauon ikar kere.

²⁷ Iitunete rwaru awaitin kere nuka akwap, kibelokinos neejai EJAKAIT: Emai ajena kere naka atekerin kakonyenekon.

²⁸ Naarai ajakanut erai naka EJAKAIT: ŋes da irumit atekerin.

²⁹ Ituŋa luiusak kere enyamete emaete da: ŋul da luebonorete toma apua ekukumete kakonyeneke, Ŋopeŋol lomam epedori aitajar eketau.

³⁰Ijaanakini aur ŋes: Elimokinio nuka EJAKAIT aitodol atur naejauni.

³¹Epote elimonokinete adoliteke Mama ejaas ituŋa lumoolo eurio, ebe eswama ŋin.