Read Ebaibuli 1961 Isabulin 33 Bible Online

Isabulin 33 - Ebaibuli 1961 bible

Isabulin 33

¹Kolelata toma EJAKAIT, yes ikadolitok: Aiturit ibusakinit yenitenara kotau.

²Kimalata EJAKAIT kadeudeu: Koyeikis aiturit ŋes kisabulin luka aputio atomon.

³ Koyeikisi ŋes ekosio lokitetet: Koramakis ejok keporoto loepol.

⁴Naarai etenit akirot naka EJAKAIT; Akeswam da kere iswamai kamunonut.

⁵Emin adolit ka etube: Ileleba akwap asianut-nakamin naka EJAKAIT.

⁶ Asubunio akuj kakirot naka EJAKAIT; Ajoreke da kere keiyeŋane loka aitukuke.

⁷Etukonokini akipi nuka aŋololin nepepe bala atukit: Inadi ataroi toma odula.

⁸Koyoŋ akwap kere EJAKAIT: Komaranata luiboiete kere kotoma akwap.

⁹ Naarai abu kolim, kiswamai; Abu kicorak, kicat da.

¹⁰Itapalauni EJAKAIT ainerun naka atekerin: Itwataniari aomisio nuka ituŋa.

¹¹ Icasit ainerun naka EJAKAIT ikar kere, Aomisio da nukotauke mama ejaas aturio kere.

¹²Isirereŋitoi ateker naerai EJAKAIT Edekekec; Ituŋa luaseu araun airumeteke.

¹³ Eseseni EJAKAIT kokuju; Itei da idwe kere luka ituŋa;

¹⁴Kotoma aibois naiboio Eseseni kere luiboiete kakwap;

¹⁵ ŋopeŋol loitemonokini itauonokec kere, ŋes da loeomoomoi aswamisiokec kere.

¹⁶Emamei ekabaka loitajaritai kanuka ajore naepol; Mam lokagogoŋ eyuunio kanuka agogoŋuke naepol.

¹⁷Erai ebalasit ibore yenitai kanuka aitajar: Mam da eyuuni imodio kere kanuka akegogoŋ naepol.

¹⁸ Koany, itei akoŋu naka EJAKAIT ŋul lueyoŋito ŋes, Ka ŋul da luemunos aitimike;

¹⁹Ayuun itauonokec kotoma atwanare, Aitajar da kes kotoma obeli.

²⁰Idarito itauonowok EJAKAIT: Erai ewokokenarakinan ka ewokobuku da.

²¹Isiyalamikinito iwokotauon iŋol, Naarai kimunokin ekekiror lokalaunan.

²²Kodolok sio akoniitim, wu EJAKAIT, Kwape kimunokinor jo.