Read Ebaibuli 1961 Isabulin 34 Bible Online

Isabulin 34 - Ebaibuli 1961 bible

Isabulin 34

¹Esabuli loka Daudi; nakejulakinia ejauteneke kalwnyen nuka Abimelek lokirenea ŋes, kolot. Emalaeneriei EJAKAIT apakio kere: Aituriteke ejaununei toma aitukuka.

² Eolobobot ekatau kotoma EJAKAIT: Iirarete luitasonos iyalamikinos da.

³Kitopoloosi EJAKAIT yesi ka eoŋ da, Keturoto ekekiror nepepe!

⁴ Abu kamo EJAKAIT, kaboŋok, Kayu eoŋ kotoma akurianuka kere.

⁵Apotu kosesenata ŋes, kitacaunai: Mam bobo akonyenekec ileicikinete.

⁶ Abu lokican lo kiworo, kiira EJAKAIT ŋes, Kitajar ŋes kocanike kere.

⁷ Idukuri emalaika loka EJAKAIT alukun ŋul lueyoŋito ŋes, Eyuuni da kes.

⁸ Kiir ber, koany ebe ejok EJAKAIT! Isirereŋitoi ituŋanan yenemuno ŋes!

⁹ Koyoŋito EJAKAIT, yes ikalaunakake: Naarai emamei ibore yenipudas ŋul lueyoŋito ŋes.

¹⁰Ilwaritos iŋatunyo ludidik, eriebete eteŋei: Konye ŋul luemoete EJAKAIT mam eolikinete ibore kere yenejok.

¹¹Kopotu, yes idwe, kopupunoi: Kesisianakinete yes aiyoŋ EJAKAIT.

¹² Iŋai bo ituŋanan yenimiela aijar, Yenemina da apaarasia nuipu, tetere edumuni ajokis?

¹³ Kisinac aŋajepekon nukaronok, Ka aitukukon da aimod.

¹⁴Konyou kotoma aronis, kiswama ajokis; Komo ainapakin, kotupa da.

¹⁵ Esesenete akonye nuka EJAKAIT ikadolitok, Itoikinit da akiike apupun aimonyokec.

¹⁶ Egirito akonyen nuka EJAKAIT ŋul luiswamaete aronis, Amwatar aiitunetekec kotoma akwap.

¹⁷Apotu ikadolitok kiworoto, kopup EJAKAIT, Koyu kes kocanikec kere.

¹⁸Eapie EJAKAIT kaneejaas ŋul kere luebilil itauon, Itajari ŋul luejaas emoyo loitoronikina.

¹⁹Ipu aicaneta nuka ikadoliton: Konye eyuuni EJAKAIT ŋes kotoma kaŋun kere.

²⁰ Idari akojoke kere: Mam da amodio naebila.

²¹ Eari aronis ikaronok: Etubokinio ŋul luelaito ikadolitok.

²² Elakuni EJAKAIT itauon luka ikekejaanakinak: Mam etubokinio idio kaluemunosi ŋes.