Read Ebaibuli 1961 Isabulin 35 Bible Online

Isabulin 35 - Ebaibuli 1961 bible

Isabulin 35

¹Esabuli loka Daudi. Wu EJAKAIT, kopegata kaŋul luepegasi keoŋ: Kitiji ŋul luketijiete eoŋ.

²Kokap ebuku ka eupal, Kobwo kiŋarak eoŋ.

³Kout akwara da kigalik erot loka ŋul kalukarukitotor: Kolimok ekatau ebe, “Eoŋ akoniitajar.”

⁴Kisurum ileic kitisil da ŋul luemoete akaijar: Kitoboŋo kau kisiyaloŋoŋ ŋul luinerunete aiswamakin eoŋ aronis.

⁵Kosubata kesi bala agugu nuekutari ekwam, Kireŋe kes emalaika loka EJAKAIT.

⁶Koraun ekecerot amuton ka arurut, Korukitor kes emalaika loka EJAKAIT.

⁷Naarai apotu kolokikis eic toma aipany alokia eoŋ komameete akiro, Abokikis ekatau aipany komameete akiro.

⁸ Kobunok ŋes amudiario komam ecoit, Kipok ŋes elopet eicike loalokit: Kibirokin komudiar.

⁹ Kosodi elakar ekatau kotoma EJAKAIT: Elelakini akeitajar.

¹⁰ Etemarete akakojo kere ebe, “EJAKAIT, iiŋai bo iputotor ijo, Loiyuuni lokican kama kaŋol kaloitelekarit ŋes kagogoŋ, Eebo, lokican ka loilwaritoi kama kaŋol kaloenetart?”

¹¹Anyout ikajenak lumam edolito; Kenita akiro numam ajeni.

¹²Eropete eoŋ karonis itia ajokis, Aitisilikin ekatau.

¹³Konye eoŋ, kedekakinos kesi, Anapi inapen luka aibworo: Ketaari ekatau ailuŋ; Eboŋokini akailip toma atorobuka alopet.

¹⁴Abu kekonak kwape tikeraar ekapapero arai onaceka: Kakukum aibworo kwape yenekuudiani totoke.

¹⁵Konye do kecodokin eoŋ kiyalamikinos, kotukonokinos; Katukonokinotor luenolopaka, komam ajeni; Kanyilinyilata komam eionoete:

¹⁶Kwape lukesekelok lueinyanakinete kopucino, Kakonyanakiniata ikel.

¹⁷EJAKAIT, itodoli ai itei? Kitajar ekatau kotoma amudiarikec, Iminataka kama ejaas iŋatunyo.

¹⁸Kemalai jo kokodet loepol: Keturenenei jo kotuŋa luipu.

¹⁹ Kinyeis ŋul lueraas lukasurupoka aiyalamikin kaiŋal: Karaida ŋul lukalaito komameete akiro aedia akonye.

²⁰Naarai mam inerasi ainapakin: Konye inerunete akiro nuka aiŋal Aluikinio ŋul luiyapaara kakwap.

²¹Eebo, kaoonikinitos noi aitukekec; Kobalas ebe, “Us, ijo ba! Abu akosikonu kogipa!”

²² Ibu ijo kogipu, wu EJAKAIT: sirikililiŋ: Wu EJAKAIT, sirikilwaniar kamakaŋ.

²³Kokweny, konyou kotubok eoŋ akiro, Akakiro, Edekeka ka EJAKAIT ika.

²⁴ Kotubokinai wu EJAKAIT Ekadeke, kwape ejaar akonidolit; Kinyeis aiyalamar eoŋ.

²⁵Kinyeis atemar kotauonokec ebe, “Ijo ba, kwaŋin kito!” Kinyeis atemar ebe, “Kiliko oni ŋes elue.”

²⁶Kisurum ileic kisiyaloŋoŋ kere Luisiyalamikinito eoŋ adumun aronis! Kitanap ileic ka asiles lukadakanarotor!

²⁷Kibwoŋata kanuka aiyalama, kolakaros, Luitojokitos akakirot nakadolit: Eebo, kinerenenas duc ebe, “Kitopolooritete EJAKAIT, Loeminakinit akerianut naka ekebulesit.”

²⁸Kosodi inerenena akaŋajep adolitekon, Aituritekon da aitiwar akwap.