Read Ebaibuli 1961 Isabulin 38 Bible Online

Isabulin 38 - Ebaibuli 1961 bible

Isabulin 38

¹Esabuli loka Daudi, loka aiitun. Wu EJAKAIT, sirikiiretak kakoninyunyura: Karaida alecor eoŋ kotoma akadakinikon naepol.

²Naarai kediriakinos cut ikonikojoi, Karidakinit eoŋ akonikan noi.

³Emamei aŋaleu kakuanaka kanuka aisiopitekon; Kwabo emamei aiyeŋun kotoma akojoka kanuka akaronis.

⁴Naarai elaparos numam adoliteka kakouka: Kalaŋirikis noi kwape abwokon naepol.

⁵Auruut akamusunun ido abosuut, Kanuka akabaŋaanut.

⁶Kesiriebi kaeuikinitai noi; Alosi amonyi aitiwar akwap.

⁷ Naarai ilelebikina akanabet amwanis; Ido emamei aŋaleu kakuanaka.

⁸Eilor aiionokineta nuipu: Eluluk kanuka aiyaloŋoŋ nakotauka.

⁹EJAKAIT, nuemiela kere ejaas akonyenekon; Mam ibwaa ekaidiny kamakon.

¹⁰Ebala ekatau pukupuk, eŋoŋar akagogoŋ; Asesen naka akakonye, kaoliki ŋin da.

¹¹ Abwataros lukaminasi ka ikapapero kama ejaas aromaka; Abwataros da lukajenaka.

¹²Ŋul da Iuirigaete aijaraka, kalokete; Ka ŋul da luitojokito eoŋ aanyun ican Ineras nuka ameŋeranut, Ido itetemonorete nuka aiŋal kotauonokec aitiwar akwap.

¹³Konye eoŋ, asubit bala ekimiŋ, mam epupi; Asubit bala ebaŋ lomam eoonari akeituk.

¹⁴Eebo, asubit bala etuŋanan lomam epupi, Emamei aitukuke aitoron.

¹⁵ Naarai kamuno jo, wu EJAKAIT: Kiboŋokini wu EJAKAIT Ekadeke.

¹⁶Naarai abu katema atiar, “Kinyeis kesi aiyalamar eoŋ: Keiurusiar akakeju kadakanarotor.”

¹⁷Naarai eapie eoŋ aicodokin, Akaiturur ejai akonyeneka tiritir.

¹⁸ Naarai alimori numam adoliteka, Kakadakinite kanuka akaronis.

¹⁹Konye eŋaleete lukasurupoka egogoŋ da: Eyatakinos ŋul lukalaito kotoma aiŋal.

²⁰ Ka ŋul da Iuinyanete aronis itia ajokis Kes lukasurupoka, naarai atupit eoŋ akirot naejok.

²¹ Sirikiijalak, wu EJAKAIT. Wu Ekadeke, sirikilwaniar kaneajai.

²² Kiwonyuni aiŋarakin eoŋ, Wu EJAKAIT loka akaitajario.