Read Ebaibuli 1961 Isabulin 45 Bible Online

Isabulin 45 - Ebaibuli 1961 bible

Isabulin 45

¹Loka Ehapolokiton lueruos; aruo naka Apecelun; Esabuli loka odwe luka Kora. Masikil. Ekosio loka Amin. Ilapanar akirot naejok kotauka; Enera akiro nuapeleu nuka ekabaka: Aŋajepeka ŋes ekalamu loka ekewadikan loekapakina.

²Itemelel ijo aitelekarit idwe luka ituŋa; Ebukokinitai asianut aitukukon: ŋes kisirereŋio Edeke jo ikar kere.

³Koenik ekonikileŋ otul, ijo ekagogoŋon, Koen akoniibuses ka apoloukon.

⁴Kibwanen kapoloukon kipiko, Kanuka abeit ka aitasono ka adolit: Akonikan da nakoteten kisisianakini jo akiro nusogim.

⁵Eitak ikonikojoi: Ibironoros ituŋa kakonyenekon; Ejaas ikonikojoi otauon luka lukasurupo luka ekabaka.

⁶ Ejaenena ekoniicoloŋ loka ajakanut ikar kere, wu Edeke: Ebela lokadolit ŋes ebela loka ajakanutukon.

⁷ Imina adolit, ilait aronis: Tape Edeke, Ekonideke, kinyonyoikini jo Akinyet naka aiyalama aitelekarit lucekon.

⁸Eurok ikoninapen kere sa luesaete, icicikwa, ka ekasia; Kisiyalamikinito jo iraman luka aputio Kotoma otogoi luka ekabaka luka ikel luka etom.

⁹Ejaas adwe nuka ikabakan toma aŋorokon nukaibuses: Ebwoi akabaka kakanikon nakoteten enapit esabu loka Opir.

¹⁰ Kiira, ijo apese, koomoom, kitoik akitikon: Kimurwokis ituŋakon, ka ekal loka papakon.

¹¹ Ŋes do imielakinor ekabaka akonitemelel: Naarai iŋes ekonijakait; komaenenei ŋes.

¹²Ebuni da apese naka Turo kainakinet; Iŋaiŋaete lukabarak kotuŋa akonimin.

¹³ Erai akoku naka ekabaka naibus kotoma ore loka ekabaka: Esonyitai inapeneke kesabu.

¹⁴Eyaŋaunio mama ejai ekabaka enapit lueculueulo: Eyaŋaunio neuai ijo Abekon nukaupake nuetupitos.

¹⁵Eyaŋaunio kaiyalama ka ailel: Elomarete togo loka ekabaka.

¹⁶ Aibois naka lukapapakon ejaunos ikonidwe, Luituluori ijaka kakwap kere.

¹⁷ Esiitununei aturio kere ekonikiror; ŋes kimalaeneneata jo ituŋa ikar kere.