Read Ebaibuli 1961 Isabulin 55 Bible Online

Isabulin 55 - Ebaibuli 1961 bible

Isabulin 55

¹Loka Ekapolokiton lueruos; koraman lukaputio. Masikil loka Daudi. Wu Edeke, kitoik akit akailip, Kwabo sirikiŋopik akaiŋaiŋa.

²Koŋolearai, koboŋokinoi: Elolitoi eoŋ kanurianaka, edinyil da;

³Kanuka eporoto loka lokasurup, Kanuka aroikinit naka ikaronok; Naarai kaeakanakis numam edolito, Ido kerigaete kanyunyura.

⁴ Kariebi etau noi kotomaka: Kadoiki da etasuro loka atwanare.

⁵Kadoloki arieŋun ka amaran, Kaunia akurian.

⁶Kasodi eoŋ ebe, “Arai kiŋa kabebenoka nuka ajelel Tikaporoo, kalot keyeŋ.

⁷Koany, tikapaa neelwana, Tikaper modiŋ. Sela.

⁸Tikadinirir nemecat Ikwamin ka akiru naepol.”

⁹Komudia, wu EJAKAIT, kotiakatiak akeceŋajepa: Naarai aany adedeŋ ka eŋuŋet kore.

¹⁰Edapadapata karwatatin paaran ka kuare aswam ŋun: Ido nepenen ejaas numam adolit ka ameŋeranut.

¹¹Nepenen da ejaas nukaronok: Mam aroikinit ka emodit enyounete korotinike.

¹²Naarai mere lokasurup kamoromoroi; Tikapedo atitiŋikin: Mere iŋopeiŋol lokalait loitopolooro bon aluikin eoŋ: Tikaiŋopik.

¹³ Konye ijo, etuŋanan oparianaka, Opaperoka, opadieaka loanaikinit noi.

¹⁴Kipou kenerununete nepepe kaiyalama, Kipou kalosenenete kotogo loka Edeke kikodeta.

¹⁵ Konesa kes atwanare, Kodokasi Okatwak ejarete: Naarai ejai aronis otogoikec, kokidiŋikec.

¹⁶Ewonenenei eoŋ elopet Edeke; Ido ketajarenenei EJAKAIT.

¹⁷ Eboŋ ka atupuruc, kokidiŋ paaran da, Aŋuriani, edinya da: Iiranari ŋesi da ekaporoto.

¹⁸ Abu kolaku akaijar kotoma ainapakin Kojie lokasurokinitere: Naarai epu luketijiete eoŋ.

¹⁹ Iirari Edeke, eboŋokini kes, Ŋes ŋol loebusi ameun apeŋo, Ŋul lumam ijulakinos, Lumam eyoŋete Edeke. Sela.

²⁰Ario akekanin mama ejaas ŋul luenapapaete kaŋes: Abu kobil akeitutuket.

²¹Ajijim akeituk bala akinyet, Konye kojio eketau: Kononok akekiro aitelekarit akinyet, Konye koraas ikileŋa lueutunitoi.

²² Kowoik EJAKAIT alanirukon, Ŋes da kiganununei jo: Mam ecamakinit ikadolitok aiiananario.

²³Konye jo, wu Edeke, itodokari kes toma aipany naka amudiario: Ikaarak ka ikeŋalak mam ebusete adaun atutubet naka apaarasiakec; Konye eoŋ kamunoneno jo.