Read Ebaibuli 1961 Isabulin 59 Bible Online

Isabulin 59 - Ebaibuli 1961 bible

Isabulin 59

¹Loka Ekapolokiton lueruos; aruo naka Sirikimudia. Esabuli loka Daudi: Mikitam: nakijukaria Saul, kirereete etogo tetere eario. Wu Ekadeke, koyuunai kama kalukasurupoka: Kikiarai kama kaŋul kalukanyoikinete.

²Koyuunai kama kaŋul kaluiswamaete numam adolit, Kitajarai kama ejaas ikaarak.

³ Naarai koany, eperunito akaijar; Etukonokinos ikagogoŋok asurokin eoŋ: Mere kanuka apaarika, kwabo mere kanuka akadiakar, wu EJAKAIT.

⁴Ekerete itemonokinos komam eoŋ ebuearit. Kokweny kiŋarak eoŋ, koany.

⁵ Ijo, wu EJAKAIT Edeke loka ajoresio, Edeke loka Isirael, Konyou aitican atekerin kere: Sirikitim ikapaanarak lueroko kere. Sela.

⁶Eboŋunete eboŋ, emonyete bala iŋokwo, Irimorete ere.

⁷Koany, ijerasi kesi; Ekwaka aitukekec bala ekileŋ: Naarai ineras ebe, “Iŋai bo iirari?”

⁸ Konye jo, wu EJAKAIT, ikienar kes; Isekelei atekerin kere.

⁹Wu jo agogoŋuka, kedareununei jo: Naarai Edeke ŋes akaŋopis naicelelei.

¹⁰Keŋarenikini eoŋ Edeke loka akaitimio: Ketaanyununei Edeke nuemiela kama kalukasurupoka.

¹¹ Sirikiar kes, kinyeis ikatuŋa aimurwokin: Kisiarisiar kagogoŋukon, kisurum ileic, Wu EJAKAIT, ekosibuku.

¹²Kanuka aronis naka aitukekec, Ka akiro da nuka aŋajepakec, Kikamunai kanuka eiturikec, Ido kanuka nuineras nuka eilam ka aiŋal.

¹³Komudia kanyunyura, Komudia kes, kinyeis bobo ajakut: Kojenut ebe irumit Edeke kotoma Yakob, Aitodol osaŋeta luka akwap. Sela.

¹⁴Koboŋut eboŋ, emonyete bala iŋokwo, Irimorete ere.

¹⁵Irimete amoot inyamat, Iwalakinete arai mam imonikinos.

¹⁶Konye eoŋ ayeenenei nuka agogoŋukon; Eebo, ayeenenei teni nuka akoniitim tupuruc: Naarai mu akaŋopis naicelelei, Amecis da kotoma apaaran naka icanika.

¹⁷Wu jo akagogoŋ, ayoonokini aiturit jo: Naarai Edeke ŋes akaŋopis naicelelei, Edeke loka akaitimio.