Read Ebaibuli 1961 Isabulin 7 Bible Online

Isabulin 7 - Ebaibuli 1961 bible

Isabulin 7

¹Sigaion loka Daudi, lokeyeikini EJAKAIT, kakiro nuka Kus Ebenyamenit. Wu EJAKAIT, Ekadeke, kamuno jo: Kitajarai kama ejaas ŋul lukarukitotor, koyuunai.

² Kinyek apoopo akaijar kwape keŋatuny, Anyilinyil ŋes, komamei yenikayuuni.

³ Wu EJAKAIT, Ekadeke, arai eswamat na; Arai ejaas numam edolito akaninika;

⁴ Arai ekwaikinit erono ŋin yenikinapapai keoŋ, (Eebo, ayu ŋin yeniketokokolit eoŋ atitai:)

⁵Korukio lokasurup akaijar, kodolok; Eebo, kipudapud akaijar kokwap, Kiperik akaibuses toma apua. Sela.

⁶ Konyou, wu EJAKAIT, kotoma anyunyurakon, Kodakun asurokin adedeŋ naka lukasurupoka: Kokweny kanukaŋ; icorak ijo etube.

⁷Kirimo ijo atukot naka ituŋa: Kodok kes koboŋoria toma akuj.

⁸Ijaikini EJAKAIT etube otuŋa: Kotubokinai wu EJAKAIT, kwape ejaar akadolit, Ka abeit da naejai tomakaŋ.

⁹ Konaŋ ca do aronis naka ikaronok, konye kiticat ijo ikadolitok: Naarai itemi Edeke lokadoliton itauon ka iŋeretenya.

¹⁰Ekabuku ejai ka Edeke, Loitajari luejaas itauon luitenara.

¹¹Edeke ŋes ekatubon lokadoliton; Eebo, ŋes Edeke loisiopit ŋinipaaran.

¹²Arai mam ituŋanan ibelokin, ipeni Edeke ekekileŋ; Eketaki akekabwa, alok da.

¹³Etemonoki da ŋesi iboro lukaarak; Itasarani ikemalia.

¹⁴Koany, erieba ikaronon aidoun numam edolito; Eebo, apotuu ameŋeranut, edou da aiŋalanut.

¹⁵ Abu kigir aipany, kobok da, Ebirokin elopet toma acukulet naaboki.

¹⁶ Eboŋokini akemeneranut akouke kelopet, Eboŋokini da akededeŋ osiadukuke.

¹⁷Emalai EJAKAIT kwape ejaar akedolit: Ayei aiturit ekiror loka EJAKAIT Loejai kuju kakuj.