Read Ebaibuli 1961 Isabulin 73 Bible Online

Isabulin 73 - Ebaibuli 1961 bible

Isabulin 73

¹Esabuli loka Asap. Abeit ejok Edeke mama ejai Isirael, Ido mama ejaas luesegas kotauon.

²Konye eoŋ, nepetai akakeje apaar; Nepetai da eoŋ ajurusiar kotoma alositeka.

³Naarai etokokolit eoŋ luituroko, Naanyunia akerianut naka ikaronok.

⁴Naarai emamei ariebo katwanarekec: Konye icasit akecegogoŋ.

⁵Mam kes iticanitos bala icetuŋa; Karaida aisiriebio kwape kalucetuŋa.

⁶ Kanuka ŋun esubit eitur bala erikot loenapakinitai omurisiŋakec; Imukorit akaje kes bala anapito.

⁷Itulereras akecekonye kanuka atumes: Ipu noi luejaatar adepar luipudas ikecetauon.

⁸ Isekelos, ido kotoma aronis ŋes ineratar nuka areit: Ineras kitopoloro bonik.

⁹ Eluikinit akeceituk akuj; Ido itorit akeceŋajep kakwap.

¹⁰Ŋes aboŋunioto iketuŋa nee: Tape ikokoorete akipi nuileleba aikopo.

¹¹ Kobalas ebe, “Ikwaikini Edeke ejenum ai? Ejai da adiocoa neejai Loejai kuju kakuj?”

¹²Koany, ŋul kes ikaronok; Kanuijamamata duc, iyatanakin abarakec.

¹³ Abeit etesega eoŋ ekatau taai; Elot akakanin kotoma amamut aronis.

¹⁴Naarai keticani apaaran kere, Ŋinitupuruc da kalecorio.

¹⁵Arai katemarite ebe, “Mere kener kwaŋin,” Koany, ti kabilakebotet aturi naka idwekon.

¹⁶ Naaomoomaa epone lojenunet ŋin, Abu kesirieb eoŋ noi;

¹⁷ Aitodol nealomaria eoŋ aibois nakalaunan naka Edeke, Kaomoom esaŋekec lokokau.

¹⁸Abeit ibwaik ijo kes aiboisio nuerurut, Icakak kes toma amudiario.

¹⁹Aluoros kesi asiles atipet! Amudia kes cut etasuro.

²⁰Kwape airujasit kekwenyu ituŋanan; Kwaŋin, wu EJAKAIT, naikwenyunia ijo, imwaŋi ijo akeceput.

²¹Naarai abu kokadak ekatau, Aponi kecumi oŋeretenyaka:

²²Abu kasubite bala etiaŋ, loemamei aijen; Karai eoŋ etiaŋ kakonyenekon.

²³Konye ajaenena kajo duc: Itiŋi ijo akakan nakoteten.

²⁴ Kiŋarenikini ijo eoŋ kainerunetekon, Kokau kaŋun kisukunyikini eoŋ kaibuses.

²⁵ Iŋai bo ikan yenejai toma akui, nabarai ijo? Emamei idiotuŋanan kakwap yenepuda eoŋ dimarai ijo.

²⁶ Arumoros akakiriŋ ka ekatau: Konye Edeke ŋes atiiba naka ekatau, ŋes ekawai ikar kere.

²⁷Naarai, koany, ŋul luelwaka kamakon eoliorete cut: Imudia ijo ŋul kere lukinyeis jo kolosete eporo.

²⁸ Konye ejok eoŋ aapu kama ejai Edeke: Etarau EJAKAIT Edeke akaŋopis, Tetere alimonokini nukaswamisiokon kere.