Read Ebaibuli 1961 Isabulin 80 Bible Online

Isabulin 80 - Ebaibuli 1961 bible

Isabulin 80

¹Loka Ekapolokiton lueruos; aruo naka Apecelun. Aitejenikinet naka Asap, Esabuli. Wu ekecokon loka Isirael, kopupok, Ijo loiŋarenikinit Yosep bala esipan loka amerekekin; Ijo loiboie kama kikerubin, kocaik.

²Kisidik akonigogoŋ kakonyen nuka Epuraim ka Benyamin ka Manase, Kobu aitajar sio.

³ Kinyakarai sio bobo, wu Edeke; Kitacau akonikonyen, sio da kitajario.

⁴Wu EJAKAIT Edeke loka ajoresio, Itodoli ai inyunyurikinit ailip naka ikonituŋa?

⁵Itanyam ijo kes atap naka akiyo, Itamat kes akiyo nuipu noi.

⁶Kitarau sio eŋuŋet kama ejaas iidunyetakosi: Lukasurupokosi ekienanakinos bonik.

⁷Kinyakarai sio bobo, wu Edeke loka ajoresio; Kitacau akonikonyen, sio da kitajario.

⁸ Ibu kitolom emusabibu anyoun kakwap nako Misiri: Ibu kireŋea atekerin, kiraik ŋes.

⁹Ibu kirienya akwap kakonyeneke, Koremo akejeke kwap noi, kiriam akwap kere.

¹⁰Abu etolimike korapia iroŋan, Aketenuna koputos kiresia luka Edeke.

¹¹ Kigananata aketenun kiton aŋolol, Akelibuneta da kodolo Ocor.

¹² Kanukinyo ibilia ijo akebwas, Tape luitorete orot kere edeŋete?

¹³Iboiboi eputir akitoike, Itiaŋ da lukadedeŋak lukais enyamete ŋes.

¹⁴ Wu Edeke loka ajoresio, kiŋaiŋait jo, kibelokin bobo: Koŋolia kwap ijai kuju, kosesen, Koanyana emusabibu lo.

¹⁵ Atorom naabu akonikan nakoteten kiraik, Ka atenu naibu ijo kitogogoŋ kanukon.

¹⁶Icweio kakim, ajepar cut: Etwakete kisiŋir luka akonyenekon.

¹⁷ Kojaun akanikon neejai etuŋanan loka akanikon nakoteten, Neejai okoku loka etuŋanan loibu ijo kitogogoŋ kanukon.

¹⁸Kwaŋin mam sio kiboŋori kama ijai ijo: Kitajarunai sio, sio da kiwonei ekonikiror.

¹⁹ Kinyakarai sio bobo, wu EJAKAIT Edeke loka ajoresio; Kitacau akonikonyen, sio da kitajario.