Read Ebaibuli 1961 Isabulin 83 Bible Online

Isabulin 83 - Ebaibuli 1961 bible

Isabulin 83

¹Ekosio, Esabuli loka Asap. Wu Edeke, sirikililiŋ: Wu Edeke, sirikitau ti, sirikipala.

² Naarai, koany, ecelasi lukasurupokon: Ŋul da lukilaito jo ekeut akwes.

³ Inerunete kapirianut abilakin ikonituŋa ebotet, Iŋitanaros nepepe aluikin lukibwaitonokon.

⁴ Atemasi atiar, “Kopotu, kamudiasi kes kinyeis araun ateker: Tetere mam bobo ekiror loka Isirael iitununoo.”

⁵Naarai eŋitanaros nepepe, acamut da kediopetau; Etutukoto aluikin jo.

⁶Iweman luka Edom ka Isimaelin; Moab ka Ikagarein;

⁷Gebal, ka Amon, ka Amalek; Pilisitia ka luiboiete kotoma Turo.

⁸Asuria da imorikikina nepepe kakes, Eŋarakis kesi idwe luka Lot. Sela.

⁹ Kiswamak ijo kes kwape kaMidian; Kwape ka Sisera, kwape ka Yabin kocor loka Kison:

¹⁰Luatwakikinete En-dor; Koraunos da aworet naka akwap.

¹¹ Kiswamak ikapolokokec kwape ka Oreb ka Seeb: Eebo, ikapolokokec kere kwape ka Seba ka Salumuna.

¹²Luatemasi ebe, “Ketarautu oni Ironyia luka Edeke luwok.”

¹³Wu Ekadeke, kituluo kes kwape apua naka etapipirio; Kwape da kagugu nuekutari ekwam.

¹⁴Kwape kakim naicwei amagoro, Kwape kaipelonoreta nuka akim nuinokokinete iroŋan;

¹⁵Kibwap kes kwaŋin kekonikwam loededeŋ, Kitukurian kes kekonitapipirio loepol!

¹⁶Kisileleb ileic akonyenekec; Tetere emoete ekonikiror, wu EJAKAIT.

¹⁷Kisurumai kes ileic, kisiyaloŋoŋoi ikar kere; Kitisiloi kitoolioroi da.

¹⁸Tetere ejenunete ebe ijo bon, Loerai ekonikiror YAWE, Irai Loijai kuju kakuj koyaite akwap kere.