Read Ebaibuli 1961 Isabulin 89 Bible Online

Isabulin 89 - Ebaibuli 1961 bible

Isabulin 89

¹Masikil loka Etan Eserakit. Ayei nuka aitim naka EJAKAIT ikar kere: Itejenuni da akaituk amunonutukon mama ejaas aturio kere.

²Naarai atema atiar, “Edukio aitim ikar kere: Iticasi ijo akonimunonut kotoma akuj cut.

³ Etutuk kaloseunaka, Eyapoik Daudi ekabulesit;

⁴ Eticasi aurikon ikar kere, Aduki eicoloŋokon loka ajakanut mama ejaas aturio kere.” Sela.

⁵Wu EJAKAIT, ituri akuj nukaumokinikon, Akonimunonut da katukot naka lukalaunak.

⁶Naarai iŋai bo EJAKAIT kitirianere jo kotoma akuj? Iŋai da kodwe luka idekesio iputotor ijo?

⁷Edeke loiŋosibib noi kainerunet naka lukalaunak, Loibus ayoŋit adepar ŋul kere luirimorito ŋes.

⁸Wu EJAKAIT Edeke loka ajoresio, Iŋai bo lokapedor kwape kajo, wu Edeke? Akonimunonut da kirimorit jo.

⁹ Iyait ijo ewoŋo loka aŋolol; Naedakunotor akailan nukotoma, isililiŋi ijo kes.

¹⁰ Ibilibil ijo Rakab kwape yenearitai; Isiarisiar lukasurupokon kakan nakagogoŋukon.

¹¹Erai akuj nakon, ka akwap da erai nakon; Akwap ka ailelebake, ijo kisubuni kes.

¹² Ijo ŋes isubi ari naka agolitome ka ari naka eŋalakimak: Iyalamas Tabor ka Kerumon kokirorikon.

¹³Ejai jo akan naka apedor: Erai akanikon nakagogoŋ, ikiara akanikon nakoteten.

¹⁴Adolit ka etube kes apeteta nuka eicoloŋokon, Aitim ka abeit kes kiŋarenikinito jo.

¹⁵ Isirereŋitoi ituŋa luejenete aruo naka arupepe: Wu EJAKAIT, elosenenete kotoma aica naka akonyenekon.

¹⁶Isiyalamikinito ekonikiror apaaran kere: Itopoloorio da kes kadolitekon.

¹⁷Naarai ijo aibuses naka agogoŋukec: Kotoma asianutukon ŋes itopoloorere amumwaratakosi.

¹⁸ Naarai ebukuwok ŋes loka EJAKAIT; Ekabakawok da ŋes loka Lokalaunan loka Isirael

¹⁹Ibu kolo kiner kalukalaunakakeŋ kaitapoet, Kotema atiar, “Ebwaik aiŋarakinio neejai ŋol loegogoŋ; Etopoloo da ediopet loeseunitai kotuŋa.

²⁰ Aseu Daudi ekabulesit; Enyonyoik ŋes akakinyet nakalaunan:

²¹Iticasenenei akakan; Akakan da itogogoŋi ŋes.

²²Mam lokasurup eŋasi ŋes; Karaida okoku loka aronis aitican ŋes.

²³Esibirori eoŋ lukasurupoke kakonyeneke; Adanyi da luelaito ŋes.

²⁴ Konye akamunonut ka akaitim ejaununos nepepe kaŋes; Kokirorika itopoloorere akemumwarat

²⁵Ebwaikini akekan aŋolol, Akekan da nakoteten ebwaikini ocorin.

²⁶ Emonyenenei mamaka ebe, ‘Irai ijo papaka, Ekadeke, atiiba da naka aitajarioka.’

²⁷ Etarauni da ŋes ekakiyai, Ido loitelekarit ikabakan kere luka akwap.

²⁸Edarenenei akaitim kanukeŋ ikar kere, Akaitutuket da icasi cut kamakeŋ

²⁹ Mam etanaŋi akeur ikar kere, Ka ekeicoloŋ loka ajakanut kwape kepaarasia nuka akuj.

³⁰ Arai kejala ikedwe ekakisil, Komam etupito itubesiaka;

³¹Arai kebila ikakisila, Komam ericete akaicorakineta;

³²Ŋes do eticania eoŋ aibucaretakec kebela, Numam adolitekec da kamacareta.

³³Konye mam erikari cut aitimika kamakeŋ, Karaida aiŋoŋar akamunonut.

³⁴Mam abili akaitutuket, Karaida aijulakin akirot naadau alomun kaitukuka.

³⁵ Eyapo adiopekirot kalauniteka; Mam eŋalai Daudi;

³⁶ Ejaenena aurike ikar kere, Ekeicoloŋ da loka ajakanut kwape kakoloŋ kama ajai.

³⁷ Iticasio ikar kere kwape kelap, Ido kwape kekajenan lomunot kotoma akuj.” Sela.

³⁸Konye icakar ijo isac da, Inyunyurik lokinyonyoikitonokon akinyet.

³⁹ Ila aitutuket naka ebulesitikon: Itisil da akeboko acakakin kwap.

⁴⁰Ibelebel ijo iregiake kere; Itiyatiya da ikereria.

⁴¹Luitorete orot kere enaŋete ŋes: Araun ŋesi amorosit koidunyetake.

⁴²Itopoloo ijo akan nakoteten naka lukekoloke; Isiyalamik da lukasurupoke kere.

⁴³Eebo, itiŋiŋ ijo akwanis naka ekileŋike; Mam ibu kitobwo ŋes kojie.

⁴⁴Itanaŋ apiripirike, Icakak eicoloŋoke loka ajakanut kwap.

⁴⁵Ituurian apaarasia nuka atumunike; Iburia da ŋes kileic. Sela.

⁴⁶Wu EJAKAIT, itodoli ai iŋopit ikar kere? Itodoli ai akoninyunyura enoki bala akim?

⁴⁷ Okwe kiitu kwape eurianar apakika; Aamameak anyoika kisubia kolo idwe kere luka ituŋa!

⁴⁸ Iŋai bo ituŋanan yenejari yenimam eanyuni atwanare, Yeneyuuni akeijar kapedor naka Okatwak? Sela.

⁴⁹ EJAKAIT, ai bo abeata aitimesiakon nulem? Nuibu kiyapok Daudi kamunonutukon.

⁵⁰EJAKAIT, kiitu amorosit naka ibulesinikon; Kwape adakitor katorobuka amorosit naka ituŋa kere lukagogoŋok;

⁵¹Nakemoromoroto lukasurupokon, wu EJAKAIT, Nakemoromoroto ikukut luka lokinyonyoikitonokon akinyet.

⁵²Kituritete ETAKAIT ikar kere. Amen, Amen.