Read Ebaibuli 1961 Isabulin 92 Bible Online

Isabulin 92 - Ebaibuli 1961 bible

Isabulin 92

¹Esabuli, Ekosio loka apaaran naka Asabato. Ejok aimalaenen EJAKAIT, Ayoere aiturit ekonikiror, wu jo Loijai kuju kakuj.

²Aitodunia asianutukon-nakamin tupuruc, Amunonutukon da ŋinikuare.

³Kobore yeniramat yenikaputio atomon, ka isabulin, Ka aruo naiyapaara naka adeudeu.

⁴Naarai ijo, EJAKAIT, kisiyalamik eoŋ kaswamukon: Ebwonenena da kaswamisio nuka akanikon.

⁵ Epolok ca ma aswamisiokon, wu EJAKAIT! Aomisiokon da idulok noi.

⁶ Etuŋanan loesubit bala etiaŋ mam ejeni; Ebaŋ da mam ejenuni ŋun.

⁷ Naelibuniata ikaronok bala inya, Naekeriakarotor lukeswamak numam adolit kere; Iswamaete kwaŋin tetere emudiario ikar kere.

⁸Konye ijo, wu EJAKAIT, ijai kuju ikar kere.

⁹Naarai, koany, lukasurupokon, wu EJAKAIT, Naarai, koany, etwakete lukasurupokon; Isiarakinio da lukeswamak numam adolit kere.

¹⁰Konye itopoloo ijo akamumwarat kwape kamumwarat naka ekosobwan: Kenyonyoikin akinyet nakitetet.

¹¹Aanyu akakoŋu nuemiela eoŋ kodoikis lukasurupoka, Apuput da akaki nuemiela apupun kama ka luiswamaete nukaronok lukanyoikis asurokin eoŋ.

¹² Ekerianar loedolit kwape edukudukut; Epoloi da kwape eres loka Lebanon.

¹³ Ŋul luiraikinio togo loka EJAKAIT, Ekeriakaros kalaroi nuka Edekewok.

¹⁴Eraenenete araito kemojoŋata; Ileleba kes akip elibilibete da.

¹⁵ Aitodunia ebe eteni EJAKAIT; Erai atiibaka, emamei da amamus adolit kotomakeŋ.