Read Ebaibuli 1961 Isabulin 94 Bible Online

Isabulin 94 - Ebaibuli 1961 bible

Isabulin 94

¹Wu EJAKAIT, ijo Edeke lokenyaŋan, Ijo Edeke lokenyaŋan, kocaik!

² Konyou, ijo ekatubon loka akwap, Koinak luituros nuibusakinito kes.

³ EJAKAIT, itodolete ai ikaronok, Itodolete ai ikaronok kibwoŋatatar?

⁴ Ineras aamameak, ineras da nuka eitur, Eoloboboto bonik ikeswamak numam adolit kere.

⁵Wu EJAKAIT, emunyumunyete kesi ikonituŋa, Aŋarut da akoniirumet.

⁶Earete apuserut ka imoit, Earete da ikoki.

⁷Kobalas ebe, “Mam EJAKAIT eanyuni, Mam Edeke loka Yakob eomoomoi.”

⁸Koomoomata yesi luisubito bala itiaŋ kotuŋa: Ka yes da ibaŋiok, icounete wori?

⁹ Ŋol lokiswamauni akit, ŋes emam epupi? Lokesubi da akoŋu, ŋes emam eanyuni?

¹⁰ Ŋol loelecori atekerin, ŋes emam iteteni? Ŋopeŋol loisisianakini ituŋanan acoa.

¹¹ Ejeni EJAKAIT aomisio nuka ituŋanan ebe, Eraas nukamameak.

¹² Wu EJAKAIT, isirereŋitoi ituŋanan yenilecorit ijo, Yenisisianakini ijo kokisilakon.

¹³Isibworari ijo ŋes kinyek aanyun apaarasia nuka ican, Aitodol naebokikinere ikaronok aipany.

¹⁴ Naarai mam EJAKAIT ecakari iketuŋa, Karaida aijal airumeteke.

¹⁵Naarai etube eboŋori mama ejai adolit; Kes da luitenara kotauon etuparete ŋes.

¹⁶Iŋai bo enyouni kanukaŋ aluikin ikeswamak nukaronok? Iŋai bo ebwoi kanukaŋ aluikin ikeswamak numam adolit?

¹⁷Kedim EJAKAIT araut ekeŋarakinanika, Esunyakinit ekatau aiboikin eililiŋa.

¹⁸Naalimunio ebe, “Ejurusiar akakeju”; Wu EJAKAIT, aitimikon ŋes kegaŋit.

¹⁹Kotoma aipues naka aomisioka kotomaka, Isiyalamikinito aitalakaretakon ekatau.

²⁰ Epedorete kereka ikayaitok lukaronok aimorikikin kajo, Luisilakinete nukameŋeranut?

²¹ Etukonokinos nepepe aluikin aijar naka luedolito, Etubokinete da aiar aokot numam aronis.

²²Konye korai EJAKAIT ekapir loeoja: Ekadeke da korai atiibaka nakerianara.

²³ Enyakaki ŋesi kes numam adolitekec, Emudiari da kes karonisikec; Emudiari kes EJAKAIT Edekewok.