Read Ebaibuli 1961 Awaragasia 1 Bible Online

Awaragasia 1 - Ebaibuli 1961 bible

Awaragasia 1

¹ Awaragasia nuka Solomon okoku loka Daudi, ekabaka loka Isirael.

²Ajenun acoa ka aituutoorio: Amisiikin akiro nuka ajenun:

³ Adumun aituutoorio kotoma aswam nukacoa, Kotoma adolit, ka etube, ka nuetenito

⁴Ainakin ijimat acobeu, Ka ekatumunan da aijen ka apirianut:

⁵Tetere epupuni lokacoa, iyatakini aisisiaun; Etuŋanan da loejenuni edolokini ainerun naeŋalei:

⁶Ajenun awarag, ka agarac; Akiro nuka lukacoa ka aibukaanaretakec.

⁷ Ayoŋit EJAKAIT ŋes ageunet naka aijen: Konye luebaŋaaka emenete acoa ka aituutoorio.

⁸Okokuka, kiira ijo aituutoor naka papakon, Sirikiŋer da aicor naka totokon:

⁹Naarai eraun aboko nakasianut kakoukon, Ka erikot komurisiŋikon.

¹⁰ Okokuka, arai kijodijodete ikadiakanarak, Sirikicam.

¹¹ Arai ebalas ebe, “Biya, kauparos, Kaperutu aiar, Kaŋopikis tai lumam akirot kaiboisio nukaiyeiyea;

¹² Kelikosi kes ejarete kwape Okatwak, Koŋaleete, kwape kaŋul kaluijesaros Aipany;

¹³Kidumuni iboro kere lukakais nuipu, Kilelebi itogoiwok luŋatan;

¹⁴Kitebeikini eroetekon mamakosi; Kimori enasoro ediopet.”

¹⁵ Okokuka, sirilosenenei kakes; Kitiku akejukon korotokec:

¹⁶ Naarai ekerete akecekeje mama ejai aronis, Ewonyasi da abukor aokot.

¹⁷Naarai epesikinio eboi taai Kakonyen nuka ŋinikweny kere:

¹⁸Eperunete ŋul akeceokot, Eŋopikinete akeceijar kaiboisio nukaiyeiyea.

¹⁹ Ŋul kes iponesio luka ŋolituŋanan loikibelikini ameda; Elemari aijar naka ikulepek.

²⁰ Ikalalat acoa korot; Ikeseuni ekeporoto kaiboisio nuelalak;

²¹Iworoi kaibois nakapolon naetukonokinoi; Kaneelomarere korutei, ore, ineria akekiro ebe:

²²“Yes lumam acoa, itodolete ai iminas amamut kacoa? Ka lukesuarak aisiyalamikinite aisuar, Ka ibaŋiok aila aijen?

²³ Kibelokinos kanuka aitoronoka: Koany, abukokini emoyoka mama ijaas, Ketejenunete akakiro.

²⁴ Naarai eworo, iŋeroto: Ario akakan, kwabo emamei yenapodokinit.

²⁵ Konye itapalaut ainerunika kere, Kwabo mam ikotosi aitoronoka nepetai da:

²⁶Aso eoŋ da akiena kapaaran naka apolakus: Esekelo kedolu akurianukus:

²⁷Kedolu akurianukus kwape ekwam, Nakidoikinio epola kwape etapipirio, Nakibunokiniata aiyaloŋoŋ ka aoyanar.

²⁸ Kosodete konyet aiwor eoŋ, konye mam aboŋokini; Kamoete noi, konye mam kadumunete:

²⁹ Naarai apotu kolaata aijen, Komam eseunete ayoŋit EJAKAIT.

³⁰Mam akotosi cut akainerun; Apotu komenata aitoronoka kere:

³¹ ŋes enyamiata araito nuka ekecerot loka ikulepek, Kimonikinos ainerunikec naka ikulepek.

³²Naarai ajurusiar kau naka lumam acoa eari kes, Ido akerianut naka ibaŋiok emudiari kes.

³³Konye ŋin yenikeirari eoŋ iboienenei icasit, Iyamakina komam ekuriana aronis.”